Pas lirimit të 3 pengjeve të para gra nga Hamasi, Izraeli liroi 90 pengje palestineze. Megjithatë, në një deklaratë Hamasi thotë se në listë mungon emri i një prej të burgosurve, teksa theksohet se Hamasi po punon me ndërmjetësit dhe Kryqin e Kuq "për të ushtruar presion mbi Izraelin që të respektojë listën e rënë dakord të të burgosurve".
Ndërkohë OKB ka dërguar mbi 630 kamionë me ndihma humanitare në Gaza, ku gjithçka është e shkatërruar.
Lajmin e dërgimit të këtyre ndihmave e bëri me dije shefi i ndihmës humanitare të OKB-së, Tom Fletcher.
“Pas 15 muajsh lufte të pamëshirshme, nevojat humanitare janë marramendëse”, tha Fletcher në mediat sociale.
Marrëveshja mes Izraelit e Hamasit
Armëpushimi, që u arrit pas një viti të ndërmjetësimit intensiv nga SHBA-ja, Katari dhe Egjipti, është i dyti që hyn në fuqi që kur nisi lufta në tetorin e vitit 2023, pasi mbi një vit më parë palët kishin ndalur luftimet për një javë dhe gjatë asaj periudhe u liruan disa pengje.
Faza e parë e saj do të zgjasë gjashtë javë, gjatë së cilës 33 nga 98 pengjet e mbetura - gra, fëmijë, burra mbi 50 vjeç, të sëmurë dhe të plagosur - do të lirohen në këmbim të gati 2,000 të burgosurve dhe të paraburgosurve palestinezë.
Gjatë fazës së parë, ushtria izraelite do të tërhiqet nga disa nga pozicionet e saj në Gaza dhe palestinezët e zhvendosur nga zonat në veri të Gazës do të lejohen të kthehen.
Komente
