Policia e Shkodrës ka gjetur lëndën plasëse që dy të rinjtë, David Simoni dhe Mikelian Tome, dyshohet se hodhën gjatë ndjekjes nga policia disa ditë më parë. Ata u arrestuan pasi me datë 26 Mars u ndoqën nga policia teksa u pikasën me një motor me targa të vjedhura dhe dyshohej se ishin nisur për të vendosur një sasi tritoli.
Sipas policisë, lënda plasëse u gjet në lagjen “3 Heronjtë” në Shkodër.
“Në vijim të informacionit të dhënë më datë 26.03.2025, për arrestimin e shtetasve M. T. dhe D. S., të cilët nuk iu bindën urdhrit të Policisë, për të ndaluar motomjetin me të cilin lëviznin, me targë të vjedhur dhe me numër shasie të ndryshuar, bëjmë me dije se nga kontrollet e kryera në vijim të veprimeve hetimore për këtë rast, dje, në lagjen “3 Heronjtë”, është gjetur një pako me lëndë të dyshuar plasëse, e cila dyshohet se është hedhur aty, nga këta shtetas, më datë 26.03.2025. Pakoja u sekuestrua në cilësinë e provës materiale.”, njofton policia.
Më 26 Mars, motoçiketa e tyre u pa në mënyrë rastësore në një prej rrugëve të lagjes “Xhabije”. Në pamje të parë, bluve u është dukur e dyshimtë dhe kanë kërkuar të ndalojnë, por drejtuesi i ka dhënë gaz. Policia është vënë në ndjekje të tyre dhe pas 20 minutash, janë kapur kur kur motoçikleta është përplasur.
Nga verifikimi i bluve rezultoi se targa e saj ishte e vjedhur dhe me numër shasie të ndryshuar. Toma dhe Simoni nuk kanë deklaruar asgjë në seancën e marrjes në pyetje, duke mos u treguar bashkëpunëtorë. Nuk dihet kush ka qenë shënjestër e tyre, ndërsa hetimet në vijim pritet të zbardhin detaje më të plota.
Plani ogurzi i të dyve hedh dyshime edhe pas kontrollit të 2 makinave të tyre, në të cilat u gjetën një bidon me benzinë, një silenciator dhe pak kokainë.
Komente
Dënoni nga 20 vite ose dërgojeni në elsalvador plehat
Përgjigju