TIRANË-Drejtorin e Policisë rrugore të Tiranës dhe 2 zyrtarët e tjerë i çoi prapa hekurave një aksident i ndodhur vetëm pak ditë më parë, më 16 prill, me protagoniste Anisa Vrionin, bashkëshorten e një biznesmeni në Tiranë, Ergest Vrioni.
Prokuroria e Posaçme njofton se e ka të faktuar momentin kur Vrioni, për të shpëtuar gruan nga arrestimi pas aksidentit me 5 të plagosur, i ka dhënë 2000 mijë euro njërit prej oficerëve të akuzuar.
SPAK thotë sipas informacionit të siguruar nga oficerët e Byrosë Kombëtare të Hetimit (BKH), ka rezultuar se punonjësit e policisë rrugore ia kanë kërkuar vetë paratë familjarëve të drejtueses së automjetit, Anisa Vrioni, 2 mijë euro për mosarrestimin e saj, shumë e cila duhet t’i dorëzohej sa më shpejt.
SPAK evidenton në njoftim se kjo kërkesë ka bërë që biznesmeni Erges Vrioni, i cili tashmë është nën hetim për korrupsion aktiv, të siguronte paratë me ndihmën e personave të tjerë dhe t’i dorëzonte ato.
Paraditen e kësaj të hënë GJKKO pranoi kërkesën e prokurores së çështjes Elida Kaçkini për arrest me burg për të prangosurin e parë, oficerin e policisë gjyqësore Edison Tabaku, ndërsa për dy zyrtarët e tjerë, shefi i Rrugores së kryeqyetit Roven Zeka dhe Sokol Novaku, shefi i aksidenteve, të cilët u vetëdorëzuan dy ditë me pas. Të tre akuzohen për korrupsion pasiv i funksionarëve publikë.
Gjatë kontrolleve të ushtruara nga Byroja Kombëtare e Hetimit janë sekuestruar në cilësinë e provës shumat prej; 2.500.000 lekë dhe 26 mijë euro.
Njoftimi i plotë:
Prokuroria e Posaçme kundër Korrupsionit dhe Krimit të Organizuar ka kryer veprime hetimore në kuadër të procedimin penal nr. 91/1, të vitit 2023.
Në dinamikën e hetimeve, në datën 18 prill, me urdhër të prokurorit të posaçëm, janë ndaluar shtetasit: R.Z, shef i Komisariatit të Policisë Rrugore, S.N, shef i hetimit të aksidenteve rrugore në këtë komisariat dhe E.T, oficer i policisë gjyqësore, të dyshuar për kryerjen e veprës penale “Korrupsion pasiv i personave që ushtrojnë funksione publike”, e kryer në bashkëpunim (parashikuar nga neni 259/2 dhe 25 të Kodit Penal.)
Ngjarja
Në datën 16 prill 2025, në qytetin e Tiranës ka ndodhur një aksident rrugor, ku dy automjete janë përplasur me njëri tjetrin. Si pasojë e aksidentit, pesë personat që udhëtonin në njërin nga automjetet janë dërguar në spital për të marrë ndihmë mjekësore.
Ndërsa në automjetin tjetër ndodhej vetëm drejtuesja A.V, bashkëshortja e shtetasit E.V, i dyshuar për kryerjen e veprës penale të “Korrupsionit aktiv të personave që ushtrojnë funksione publike”, (parashikuar nga neni 244 i Kodit Penal.)
Pas të dhënave dhe informacionit të siguruar nga oficerët e Byrosë Kombëtare të Hetimit (BKH), ka rezultuar se punonjës të policisë rrugore i kanë kërkuar familjarëve të drejtueses së automjetit, shtetases A.V, pagesën prej 2 mijë eurosh, për mosarrestimin e saj.
Shuma e parave është kërkuar të dorëzohej brenda një kohe të shkurtër dhe është siguruar nga personi nën hetim E.V, me ndihmën e personave të tjerë. Këtë shumë ai ia kanë dorëzuar njërit prej punonjësve të policisë rrugore - fakt i provuar gjatë hetimit.
Urdhri i ndalimit të shtetasve: E.T, S.N dhe R.Z është ekzekutuar nga BKH, në bashkëpunimin me Agjencinë e Mbikëqyrjes Policore. Gjatë kontrolleve të kryera për llogari të këtij procedimi penal janë sekuestruar në cilësinë e provës materiale shumat prej; 2.500.000 lekë dhe 26 mijë euro.
Komente
Dua ta dencoi se ka qen shef krimesh ne Elbasan jan shefafat qe i urdheronte Taulan balla per te na ber keq na vran dhe na dhunonin me kontrolle e shum e shum te thera
PërgjigjuShoku Shu shko në SPAK e lëri gazetat!!