Shefi i Politikës së Jashtme të Bashkimit Evropian, Josep Borrell, komentoi marrëveshjen e arritur ndërmjet Kosovës dhe Serbisë. Ai e quan të "arsyeshme" pasi synon t'i japin fund një mosmarrëveshjeje gati dyvjeçare mbi çështjen e targave në veri të Kosovës.
Borrell ka thënë se tashmë pas marrëveshjes për targat, do të sjellë të dyja palët në tavolinë për t’i diskutuar propozimet e BE-së, të mbështetura nga Gjermania dhe Franca.
“TVPWorld” shkruan se rreth 50 mijë qytetarë të përkatësisë etnike serbe që jetojnë në Kosovë refuzojnë të njohin autoritetin e qeverisë së Kosovës duke shprehur protestën e tyre sa herë që munden, për të manifestuar lidhjet e tyre me Serbinë.
Në shenjë proteste, rreth 600 oficerë policie dhe punonjës të sektorit të shërbimit publik kishin lënë punën këtë muaj.
Nuk është e qartë nëse ata që lanë punën e tyre tani do të kthehen apo do të ri-punësohen nga sektorët e tyre të mëparshëm të punës. Kosova dhe Serbia u zotuan të marrin pjesë në një dialog të sponsorizuar nga BE-ja për zgjidhjen e çështjeve ndërmjet vendeve, megjithëse pak përparim është bërë deri më sot.
Kosova shpalli pavarësinë nga Serbia në vitin 2008 dhe u njoh zyrtarisht nga 110 shtete. Serbia, Rusia, Kina dhe pesë vende anëtare të BE-së nuk e njohin Kosovën si shtet të pavarur. Rreth 3,700 ushtarë nga vendet e NATO-s janë aktualisht të stacionuar në Kosovë për të ruajtur paqen dhe rendin.
Komente
