Me poezi, nën tingujt e melodisë u pritën spektatorët në teatrin “Migjeni”, aty ku u mbajt teatri poetik "Mall për vendlindjen", me regji te Justina Aliajt. Që nga Mesjeta e deri në ditët tona, poezia shqipe erdhi e gjallë përmes interpretimeve brilante të aktorëve profesionistë shkodranë.
Një udhëtim thelbësor i ndjenjave dhe identitetit tonë kombëtar të ndërthurura me poezi, ku interpretuan Justina Aliaj, Merita Smaja, Rajmonda Marku, Jozef Shiroka, Simon Shkreli, Astrit Fani, Fritz Selmani.
Pjesë e teatrit poetik u be edhe Kori Polifonik "Prenkë Jakova" që nën drejtimin e maestro Gjon Shllakut i dha muzikalitet të veçantë kësaj mbrëmje.
Teatri poetik risolli në fokus rëndësinë që ka poezia me forcën e saj shprehëse dhe emocionin drithërues që përcjell.
