TIRANË- Report TV ka mësuar se një përfaqësues i klerit katolik ka shkuar në banesën e babait të Preng Gjinit, Gjergji Gjini, ndërsa ka bërë tentativë për qetësimin e marrëdhënieve mes familjeve Reçi e Gjini, ku dyshohet por ende nuk është provuar deri tani se janë autor të disa ngjarjeve që kanë tronditur vendin.
Burime të Report TV bëjnë me dije se Gjergj Gjini ka shprehur habi në momemtin kur ka dëgjuar klerikun. Sipas Gjinit ai nuk ka konflikt dhe armiqësi me askënd dhe nuk ka me kë të pajtohet.
Ndërkohë 51-vjeçari Preng Gjini, i cili u plagos nga atentati me tritol në datën 15 shtator në Tiranë vijon të jetë në Turqi për mjekim më të specializuar. Deri tani ai i është nënshtruar disa ndërhyrjeve kirurgjikale për të rifituar njërin prej syve të dëmtuar. Gjini pritet të kthehet në ditët në vijim në Shqipëri. Në lidhje me ngjarjen policia akoma nuk ka asnjë të arrestuar.
