Pasagjerët e avionit të tipit Boeing 737 në një fluturim të Southwest Airlines përjetuan momente frike, kur pak pas nisjes për në Kankun avioni u përfshi nga flakët, raporton CNN.
Ngjarja ndodhi mbrëmjen e së martës, 15 gusht 2023, motori që mori flakë detyroi pilotin të bënte një ulje emergjente në aeroportin William P. Hobby në Teksas.
Sipas videos së publikuar nga agjencia e lajmeve Reuters, një pasagjer ka filmuar incidentin ku shihet se një prej motorëve të avionit ka marrë flakë.
Në një deklaratë zyrtare, Southwest Airlines e pranoi incidentin, duke thënë se Boeing 737 kishte një "problem mekanik menjëherë pas ngritjes" dhe se avioni ishte në tokë për rishikim.
Administrata Federale e Aviacionit (FAA) do të kryejë një hetim të plotë për zjarrin e motorit.
