Avokati i njohur Naim Hasani, me karrierë në Britaninë e Madhe, ka folur sot për ndryshimin e tregut ilegal të trafikimit të emigrantëve shqiptarë në kanalin e La Mansh. Hasani ka folur ditën e sotme në "Sot Live në Shqipëri" për Report TV mbi fenomenin që ende vijon, pas fluksit të madh, siç e quajti ai, në vitin 2022.
Avokati ka thënë fillimisht se pas kulmit të jashtëzakonshëm 2 vjet më parë të dyndjes së emigrantëve shqiptarë të paligjshëm në Britaninë e Madhe, në shifrat zyrtare të vitit 2024, të publikuara nga qeveria britanike, në ishull kanë hyrë 813 persona, ndërkohë që në vitin 2022 janë regjistruar 14 mijë.
Kjo, sipas Hasanit, ka ndodhur për shkak të përpjekjeve të dy qeverive për të ndaluar këtë emigrim ilegal.
“Pa dyshim, që në vitin 2022 kishim kulmin e jashtëzakonshëm të shqiptarëve që vinin me gomone nga Franca drejt Britanisë. Jo më pak se 14 mijë e 500 qytetarë shqiptarë erdhën me gomone në Britani. Edhe statistikat, ku qeveria vetëm javën e kaluar ka nxjerrë statistikat e vitit 2024, tregojnë se vetëm 813 persona, qytetarë shqiptarë, kanë ardhur me gomone në mënyrë ilegale nga Franca drejt Italisë. Falë përpjekjeve të qeverisë britanike dhe asaj shqiptare, dhe sidomos qeverisë britanike për të frenuar fluksin, kemi një rënie drastike të numrit të emigrantëve.”-tha Hasani.
Nga ana tjetër, avokati Naim Hasani ka thënë se një informacion i ri në këtë aktivitet trafiku është ndryshimi i çmimit në tregun e emigrantëve të paligjshëm. Sipas tij, ka ndryshuar "pazari për çmimin e ardhjes në Britaninë e Madhe", ku shkon në shifrën e lartë prej 23 mijë euro.
“Ajo që është e re dhe që është rritur në mënyrë të ndjeshme është pazari që bëjnë trafikantët për të futur ilegalisht në Britani shqiptarët që kanë dëshirë të hyjnë në territor. Shifrat shkojnë deri në 23 mijë euro për një rrugë për të ardhur në Britaninë e Madhe.”-tha Hasani.
Komente
