Përdorimi i alkoolit mbetet një ndër shkaqet e aksidenteve në Shqipëri. Ndonëse krahasuar me vitin e kaluar, ka thuajse një përgjysmim të rasteve, pasojat fatale me humbje jete janë trefishuar nga janari deri në ditët e fundit të këtij muaji. Report Tv sjell në mënyrë të detajuar rastet e ndëshkimeve të shoferëve që kapen të dehur në timon.
***
Një makinë “SsangYong”, që futet mes turmës me njerëz gjatë mbrëmjes së të martës në bulevardin “Epidamn” në Durrës, kishte në timon një të dehur, shqiptaro-britanik, Vasil Delia, 52 vjeç. Incidenti përfundoi pa të dëmtuar, ndërsa Delia u arrestua.
Shoferë nën avujt e alkoolit, vijojnë të jenë gangrena e rrugëve në të gjithë vendit, duke prodhuar aksidente nga veriu në jug. Referuar të dhënave që Report Tv siguron nga Policia e Shtetit, gjatë periudhës nga 1 janari deri më sot, 27 gusht, si pasojë e lëvizjes nën efektin e alkoolit apo në gjendje të dehur, në të gjithë vendit u regjistruan në total 19 aksidente me pasoja, të lehta ose të rënda. Të paktën 7 persona humbën jetën.
Viti i kaluar kishte një numër shumë më të lartë, gati dyfish, të aksidenteve për shkak të alkoolit, nga të cilat pati vetëm 2 viktima.
Përgjithësisht, të dehurit në timon, shkaktojnë aksidente në parakalime të gabuara dhe shpejtësi tej normave të lejuara. Si pasojë e alkoolit, i cili ndikon direkt në aftësitë orientuese, ulet përqendrimi, vëmendja, ngadalësohen reflekset, ndryshon perceptimin mbi largësinë apo distancën dhe rrit vetëbesimin e rremë. Të gjitha në kompleks shkaktojnë aksidente që shpesh përgjakin rrugët.
Por çfarë thotë Kodi Rrugor për të dehurit në timon?
Të gjithë ata që konstatohen me vlerë nga 0.0 g/l deri në 0.3 g/l, gjobiten nga 5 mijë deri në 15 mijë lekë. Atyre që kanë më pak se 3 vjet patentë, shoferëve e makinave mbi 3.5 ton, dhe autobusëve, taksistëve, u pezullohet patenta nga 3 deri në 6 muaj.
Gjoba shkon nga 10 mijë deri në 20 mijë lekë, nëse vlera është midis shifrave 0.3 deri në 0.5 g/l, plotësuar edhe me heqje patente nga 3 deri në 6 muaj. Sa vjen dhe rritet sasia e alkoolit, shtohet ndëshkimi.
Nga 0.5 deri në 0.8 g/l gjoba është nga 10 deri në 20 mijë lekë, por pezullimi i patentës bëhet nga 1 deri 2 vjet. Gjobë nga 20 deri në 40 mijë lekë dhe pezullim patente nga 1 deri në 2 vjet nëse vlera e alkoolit rezulton nga 0.8 deri në 1.5 g/l.
Për të gjitha rastet e konstatimit “i dehur në timon”, nga 0.1 g/l e në rritje, bëhet edhe heqja e pikëve të patentës, 8 nga 20 në total dhe nëse është ripërsëritur brenda vitit, i hiqen edhe 10 pikë të tjera. Mbi 1.5 g/l alkool, i hiqet krejtësisht patenta.
Përveç të gjitha masave të mësipërme, nëse shoferi i dehur ka shkaktuar aksident vetëm me pasoja materiale, i bllokohet edhe mjeti, nëse ai është pronar. Ndërkohë, gjobat rriten natën. Nga ora 22:00 e mbrëmjes deri në 07:00 të mëngjesit, shtohen nga një e treta deri në dy të tretat.
Kur kryhet një arrestim në flagrancë?
Policisë Rrugore i lind e drejta që në momentin kur aparati matës nxjerr vlerën 0.5 g/l e sipër, të kryejë dhe arrestimin, që çon më pas në ndjekje penale. Megjithatë, bazuar në urdhrat e prokurorit, në disa raste mund të ketë përjashtim nga arrestimi edhe nëse vlera e kalon 0.5 g/l, ndikuar nga rrethanat, një nënë më fëmijë të vogël apo një i moshuar mbi moshën 70 vjeç. Por këto lehtësira nuk vlejnë në rastet kur aksidenti është me pasoja.
Komente
