Vetëm pak kilometra larg vendit të ngjarjes ku një krim brenda familjes tronditi opinionin dhe la pas tre viktima, një ngjarje që mund të kishte përfunduar me viktima po brenda familjes është parandaluar në fshatin Vilëz të Tiranës.
Policia njofton se në pranga është vënë A. V., 42 vjeç, banues në fshatin Vilëz në Zall Bastar/Tiranë pasi në mënyrë të vazhdueshme ushtronte dhunë fizike dhe psikologjike ndaj familjarëve (bashkëshortes, djalit dhe vajzës).
Gjatë kontrollit të ushtruar në banesë e të arrestuarit policia gjeti dhe sekuestroi një armë zjarri pistoletë me mulli dhe fishekë luftarakë. Tashmë i arrestuari do të përballet me akuzat për veprat penale "Dhunë në familje" dhe "Mbajtja pa leje e armëve luftarake dhe e municionit".
Kujtojmë se pak orë më parë në fshatin Xibër të bashkisë Klos, në kufi me fshatin Vilëz, një 55-vjeçar vrau vëllanë së bashku me nipin (djalë i viktimës), dhe më pas vrau vetën, për shkak të një konflikti për një gardh.
Komente
