Kreu i grupit parlamentar të Partisë Socialiste, Taulant Balla mori pjesë sot në Sesionin e II të Parlamentit Ndërkombëtar për Tolerancë dhe Paqe. Balla, i cili është President i Parlamentit Ndërkombëtar për Tolerancë dhe Paqe u shpreh në Sesionin e II se bashkë-ekzistenca e të gjitha komuniteteve në paqe, tolerance dhe harmoni është modeli më i vyer për Shqipërinë.
"Jo vetëm duhet ta mbrojë, por edhe duhet ta eksportojmë në një Europë të bashkuar, e cila edhe vetë duhet të prevalojë mbi diferencat fetare”, tha Balla, duke shtuar se vendi është i rëndësishëm në rajonin e trazuar të Ballkanit, pasi eksporton veçse paqe, tolerancë dhe stabilitet.
“Rruga jonë europiane dhe e rajonit kalon pikërisht përmes normalizimit të marrëdhënieve këtu në Ballkanin Perëndimor, si një proces dinamik ku dialogu i vazhdueshëm, pa tabu, aspak me komplekse, rimëkëmb besimin te vetja dhe te fqinjët”, theksoi kreu i grupit parlamentar të PS-së.
Balla tha më tutje se kjo qasje “realiste dhe pa tabu” do të vijojë përkundrejt të gjitha mosmarrëveshjeve të së kaluarës e së tashmes me fqinjët. “Shqipëria ka një të ardhme të projektuar qysh prej të parëve tanë në gjirin e kombeve të qytetëruar të Europës dhe që sot është në një moment kyç në rrugëtimin drejt Europës”, komentoi ai.
Komente
