Kryetari i Grupit Parlamentar të Partisë Socialiste, Taulant Balla dhe kryetari i Bashkisë së Librazhdit, Kastriot Gurra panë nga afër urën e dëmtuar në fshatin Togës të Librazhdit, e cila u shërben 500 banorëve.
E ndërtuar më shumë se 40 vjet më parë, ura e varur që lidh fshatin Togës me pjesën tjetër të Librazhdit është dëmtuar shumë për shkak të erozionit dhe punimeve pa kriter që ka bërë kompania e cila ka ndërtuar HEC-in. Gjatë takimit me banorët, Balla diskutoi për mundësitë e zgjidhjes së këtij problemi, duke kërkuar edhe ndërhyrjen e ushtrisë. Balla u shpreh:
“Janë 40 familje të cilat me daljen jashtë funksionit të kësaj ure humbin çdo lloj lidhje dhe komunikimi me pjesën tjetër të bashkisë Librazhd. Dëmi i shkaktuar për shkak të reshjeve të shhumta, por edhe të punimeve pa kriter nga kompania që ka ndërtuar HEC-in. Do të marrim të gjitha masat në bashkëpunim dhe me ministrinë e Mbrojtjes për të gjetur një zgjidhje.Unë mendoj që Ministria e Mbrojtjes është mënyra më e mirë për të na ndihmuar në riparimin e kësaj ure, ose në gjetjen e një vendi të përshtatshëm për të bërë një urë "Bejli", që me këtë rast të kemi edhe kalim të makinave, sepse nëse do të bëjmë investimin ta bëjmë një herë e përgjithmonë” tha Balla.
Ndërsa Bashkia e Librazhdit veç përgatitjes së projektit për ndërtimin e një ure të re, do të kërkojë edhe dëmshpërblim nga kompania e cila ka punuar pa kriter në këtë lum për ndërtimin e HEC-it. Ndërkohë kryetari Gurra theksoi:
“I jemi përgjigjur shqetësimit të banorëve në lidhje me këtë urë e cila përbën rrezik për jetën e tyre. Punimet për ndërtimin e HEC-it kanë dëmtuar edhe urën, shto edhe erozionin që ka ndodhur dhe ura është e pakalueshme dhe përbën rrezik. Shumë shpejt do të bëjmë gati projektin dhe do të kërkojmë ndihmë dhe nga institucione të tjera për të bërë rikonstruksionin e urës” tha Gurra.