15 milionë euro është financimi që do të jap Banka Botërore për Shqipërinë pas kërkesës së qeverisë. Ky financim i miratuar pak orë më parë do të përdoret për të ndihmuar parandalimin, zbulimin dhe veprimin ndaj pandemisë së COVID-19.
Po ashtu ky fond pritet të përdoret edhe për fuqizimin e sistemit shëndetësor, për të ruajtur shëndetin publik.
“Në përgjigje të kërkesës së Qeverisë, projekti do të japë mbështetje të menjëhershme për të ndihmuar Shqipërinë të kufizojë transmetimin lokal të COVID-19”, thuhet në njoftimin e Bankës Botërore.
Po ashtu ky projekt do të mbështesë edhe testime masive të popullsisë, sigurimin e pajisjeve për të fuqizuar zbulimin dhe gjurmimin e kontakteve, investime për pajisje për kujdesin shëndetësor dhe për laboratorët publikë, pajisje mbrojtëse për personelin mjekësor, rritjen e numrit të shtretërve në kujdesin intensiv si dhe fuqizimin e kapaciteteve për vlerësimin dhe modifikimin e kërkesave për distancimin fizik.
“Banka Botërore qëndron në krah të popullit shqiptar në këtë krizë të paprecedentë. Do të doja të vlerësoja përkushtimin e jashtëzakonshëm të punonjësve të shëndetësisë në Shqipëri për të shpëtuar jetët e njerëzve dhe inkurajoj fuqishëm qytetarët të zbatojnë distancimin social dhe masa të tjera kufizuese që synojnë të minimizojnë ndikimin e pandemisë. Duke pasur parasysh pasigurinë e ecurisë së pandemisë, projekti është hartuar në mënyrë që të jetë fleksibël dhe të plotësojë nevojat që do të shfaqen, ndërsa evoluojnë edhe njohuritë për epidemiologjinë e COVID-19,” tha Maryam Salim, Menaxhere e Zyrës së Bankës Botërore për Shqipërinë.
