Miqësorja e fundit e Francës ndaj Kanadasë nuk dha atë rezultat që pritej, teksa ndeshja u mbyll në barazim 0-0.
Tashmë ekipi i trajnerit Didier Deschamps ka 7 ditë kohë për të përgatitur sfidën e parë në Euro 2024 ndaj Austrisë.
“Në pjesën e parë kishim mundësitë më të mëdha për të shënuar, më pas, ndeshja u bë më e vështirë në fundin e saj. Barazimi nuk është rezultati ideal para se të nisë një turne kaq i rëndësishëm dhe kjo s’më pëlqen”, tha Deschamps.
Trajneri foli edhe për rëndësinë e kësaj miqësoreje.
“Gjithsesi, e rëndësishme ishte që të përfshiheshin të gjithë lojtarët e grumbulluar në këto dy ndeshje miqësore. Edhe kombëtaret e tjera të mëdha kanë hasur vështirësi në miqësoret e fundit.
Kemi edhe një javë kohë për të punuar e sistemuar disa gjëra. E rëndësishme është që të jemi gati për sfidën e parë, duke gjetur alternativa të ndryshme për të shkuar te goli e për ta nisur mbarë Europianin”, tha Deschamps.
