Farmacistët tërhiqen nga greva pas takimit me Ministren e Shëndetësisë dhe negociatave me Fondin e Sigurimeve të Kujdesit Shëndetësor. Ministrja e Shëndetësisë dhe Mbrojtjes Sociale, Ogerta Manastirliu zhvilloi sot në një takim drejtuesen e Urdhrit të Farmacistëve Diana Toma, pas shqetësimeve të ngritura gjatë ditëve të fundit dhe paralajmërimit për grevë prej Urdhrit të Farmacistëve në lidhje me listën e re të barnave të rimbursueshme.
Bashkëpunimi është shumë i rëndësishëm dhe cdo shqetësim do të zgjidhet me dialog. Që nesër ju do të vijoni në grupe të përbashkëta punë me Fondin për të adresuar aty ku është e mundur shqetësimet e ngritura prej jush
Ogerta Manastirliu
Sipas njoftimit të Ministrisë së Shëndetësisë, përfaqësuesja e Urdhrit të Farmacistëve, në emër të farmacistëve, shprehu vlerësimin për gjuhën e bashkëpunimit që gjeti për zgjidhjen e problematikave të ngritura prej tyre sa i takon kontratave të reja mes farmacive dhe FSDKSH.
Urdhri i Farmacistëve anuloi grevën e paralajmëruar për ditën e nesërme në shenjë proteste ndaj arbitraritetit që ata pretendojnë se është bërë me listën e barnave të rimbursueshme. Sot farmacistët negociuan me Fondin e Sigurimeve të Kujdesit Shëndetësor.