Përmes një bisede online, Lulzim Basha i ka kërkuar edhe një herë autoriteteve të Bashkimit Evropian se Shqipëria ka nevojë për mbështetjen e tyre financiare për rindërtimin.
Kreu i PD, Lulzim Basha, në bashkëbisedimin me komisionerin e BE-së për Buxhetin, shprehu mirënjohjen për mobilizimin e vendeve të unionit, teksa i prezantoi edhe pikën e PD-së për trajnimin e dyfishtë profesional të të rinjve, pasi rrëfeu eksperiencat nga Gjermania, Zvicra apo Austria.
"Ne jemi të vetëdijshëm se ashtu siç kanë theksuar raportet e fundit si të BE-së dhe SHBA-së, ekziston një shqetësim shumë i lartë në lidhje me korrupsionin. Dhe ne e kemi adresuar këtë si çështje me rëndësi jetike për zhvillimin e vendit. Një nga hapat e parë që po bëjmë është krijimi i Agjencisë Kombëtare kundër Korrupsionit e cila do të ketë pavarësi nga ekzekutivi dhe roli i së cilës do të jetë të trajtojë problemet e korrupsionit në të gjitha nivelet. Sundimi i ligjit, konkurrenca, lufta kundër korrupsionit janë përparësitë tona dhe përmes këtyre përparësive ne do të bëjmë të mundur që investitorët evropianë të kthehen në Shqipëri, të sjellin investimet e tyre këtu.
Me programin tonë, ne jemi duke u përqendruar te trajnimi profesional i dyfishtë, si dhe te praktikat. Dhe këtu do të na duhet gjithashtu shumë ndihmë nga ju, nga BE, nga Komisioni i BE dhe gjithashtu nga fondet e BE në mënyrë që nga fondet IPA dhe fondet e tjera të mund të bashkohen dhe fondet tona, fondet e Qeverisë Shqiptare për të bërë të mundur që ne të kemi një hov cilësor. Sepse kriza aktuale siç e dimë të gjithë po bën që vendet e BE-së të rimendojnë zinxhirin e furnizimit. Dhe Ballkani Perëndimor duhet ta shohë këtë si një mundësi të artë”, tha Basha.
Nga ana e tij komisioneri Hahn i tha kryedemokratit se mbështet planin për trajnimin e dyfishtë profesional.
"Në fokusin tuaj në trajnimin e dyfishtë profesional, është diçka që mund ta mbështes plotësisht me gjithë përvojën që kam nga vendi im , por edhe Gjermania, Zvicra, Austri ku kemi shumë përvojë me këto skema të formimit profesional të dyfishtë për shumë vite. Kjo është arsyeja pse në shumë vende shkalla e papunësisë së të rinjve është mjaft e ulët, sepse të rinjtë kanë mundësi të punojnë edhe gjatë arsimimit të tyre", tha Hahn.
