Drejtuesi politik i Koalicionit Euroatlantik, Lulzim Basha, prezantoi sot (5 prill) programin elektoral gjatë takimit që pati me qytetarë dhe strukturat në Degën 9 në Tiranë, në kuadër të zgjedhjeve parlamentare të 11 majit.
Ai ishte i shoqëruar nga kandidatët për deputetë Orjola Pampuri, Marçel Hila dhe Alfred Ahmetcenaj.
Duke iu përgjigjur edhe një deklarate të ditës së sotme të kryetarit të PD, Sali Berisha, Basha tha se ka bashkëpunim të dyshes Rama-Berisha dhe jo të tij me kryeministrin, ndërsa shtoi se “ata në këto zgjedhje donin t’u ofronin shqiptarëve ose njërin, ose tjetrin”.
Berisha tha sot nga Malësia e Madhe se 'Lul Brava bënte gili-vili me Ramën duke shkatërruar opozitën', kurse kryeministri ironizoi kreun e KEA nga Nhjësia nr. 14 duke pyetur nëse "ka ndonjë votë apo deputet në zonë".
Basha nga ana e tij, i ironizoi bashkëpunimin me "bufat" që nxjerrin në daljet publike, duke thënë se njëri mban bufin e florinjtë, e tjetri mban bufin e bardhë. Nënvizoi se 'bufat i bashkon i njëjti hall që është përballja me SPAK', ndërsa për kryeministrin shtoi se “sado që ta fërkojë bufin dhe pazaret që bën me të, nuk e shpëton asgjë nga llogaridhënia para shqiptarëve”.
“Janë bërë bashkë, njëri mban bufin e bardhë, tjetri mban bufin e florinjtë. E mban bufin e florinjtë Edi Rama dhe e fërkon ditë e natë, se me bufin e ka mbajtur pushtetin deri më sot dhe e gënjen mendja se me bufin e për shkak të bufit, do e mbajë pushtetin edhe pas 11 majit. Me bufin e bashkojnë hallet, me bufin janë të bashkuar kundër SPAK-ut. Unë i them sot, fërkoje bufin edhe për pak kohë”.
Dhe jep shembuj konkret të bashkëpunimit mes dyshes Rama-Berisha:
“Por nuk ke për të pasur dot shpëtim nga dita e llogarisë. Ke 12 vite që e shmang përgjegjësinë, ke 12 vite që i ikën llogaridhënies para shqiptarëve, të bashkojnë shumë gjëra me bufin, që nga pazaret politike, lirimi i të korruptuarve, Mali i Tiranës pak më tej, të gjithë e dimë, malet e betonit, janë pazaret e përbashkëta të Edi Ramës dhe doktor pazarit. Por të gjitha këto janë bashkëpunime për interesat e tyre kundër interesave të shqiptarëve”.
Ai apeloi ndaj shqiptarëve që duan ndryshimin, se në 11 maj ka një alternativë, që është Koalicioni Euroatlantik dhe numri 4 në fletën e votimit.
“Shumicën e shqiptarëve i bashkon vetëdija se pa larguar Edi Ramën, kreun e qeverisë më të korruptuar që nga 1912, gjysma e të cilës është tek 313-ta dhe bufin e tij, Shqipëria nuk mund të bëjë asnjë hap përpara. Ndaj, është kjo shumicë shqiptarësh që Edi Rama dhe Sali Berisha donin t’i mbanin në shtëpi më 11 maj, duke iu dhënë zgjedhjet pa zgjidhje “o mua, o kundërshtarin tim”. Është kjo shumicë shqiptarësh që pret nga ne të kontaktohet, t’i flitet, t’i shpjegohet e t’i jepet arsyeja pse më 11 maj nuk ka zgjedhje pa zgjidhje, pse më 11 maj fal jush dhe shumë si ju ka zgjidhje, ka alternativë, Koalicioni Euroatlantik, numri 4, programi ynë dhe ekipi ynë”, përfundon ai.
Komente
