Në këto ditë të vështira, gatimet e zonjës Vjollca në emisionin e mëngjesit “Rreze Dielli” në Report Tv do të kenë destinacion të moshuarit të cilët gjatë ditëve të karantinimit e kanë të pamundur të blejnë ushqime e të gatuajnë vakte të shëndetshme. Sapo mbaron emisioni, ushqimet i çohen një të moshuare në nevojë të caktuar nga Bashkia e Tiranës.
Emisioni “Rreze Dielli” ka vendosur t’i bashkohet nismës së Bashkisë së Tiranës “Adopto një gjyshe” si një mënyrë për të dhënë kontributin e vet në luftën e përbashkët kundër virusit që po merr jetë njerëzish duke ofruar ushqimet që gatuhen në emision për të moshuarit e Tiranës.
Krahas informacioneve që jemi përpjekur të japim nëpërmjet të ftuarve të përzgjedhur, por edhe argëtimit, sot “Rreze Dielli” do të përpiqet të ofrojë vaktin e ngrohtë për njërën nga gjyshet e mrekullueshme të Tiranës.
Më të njerëzishëm dhe me më shumë dashuri për njëri tjetrin, bashkë do ia dalim!
