Basketbolli shqiptar zhvilloi finalet e Superkupës, ku për femra triumfoi Flamurtari, ndërsa Besëlidhja shkroi historinë duke e marrë këtë trofe për herë të parë te meshkujt.
Flamurtari 81-59 Tirana
Flamurtari është shpallur për herë të pesëmbëdhjetë fituese e Superkupës së Shqipërisë në basketboll për femra. Gjithçka ka ndodhur në Pallatin e Sportit në Fier, ndërsa vlonjatet e Agim Dalipit kanë patur përballë Tiranën, e cila është kampione në fuqi.
Një javë më parë skuadrat u ndeshën mes tyre në finalen e Kupës së Federatës Shqiptare të Basketbollit, që u zhvillua në Elbasan, ndërsa fituan vajzat bardheblu. Tanimë llogaritë dolën ndryshe, me vajzat vlonjate që çuan trofeun në qytetin bregdetar. Lojtarja më e mirë e Superkupës së Shqipërisë në basketboll për femra ishte Jonson.
Besëlidhja 100-57 Tirana
Besëlidhja është për herë të parë fituese e Superkupës së Shqipërisë për meshkuj. Në një finale të dominuar tërësisht nga lezhjanët, në fund erdhi një fitore me 43 pikë diferencë për Besëlidhjen. 100-57 ndaj Tiranës, ndërsa Besëlidhja e Afrim Bilalit është dalluar veçanërisht në gjuajtjet për tre pikë, duke realizuar 15 të tilla. Lojtari më i mirë i finales ishte Julian Hamati i Besëlidhjes.
