Pas dhunës mes basketbollisteve në derbin mes Partizanit dhe Tiranës në kampionatin kombëtar të basketbollit, ka reaguar edhe klubi i kuq. Në reagim thuhet se basketbollistet e kuqe janë ofenduar në baza racore dhe se çështja do ndiqet ligjërisht.
"Duke marrë shkas nga publikimet e mediave të ndryshme online, kemi të drejtën të publikojmë pamje filmike ku dallohet qartë përfshirja e sportisteve të ekipit kundërshtar si dhe goditjet e tifozëve nga jashtë nxitur nga stafi i ekipit kundërshtar. Goditje nga djem kundrejt lojtareve amerikane dhe lojtareve të Tiranës të cilat përgjatë gjithë takimit kanë kryer akte të dhunshme dhe ofendime sidomos në baza raciale kundrejt lojtareve tona. Një shfaqje e turpshme pas dy ndeshjeve të fituara nga ekipi me më shumë dëshirë, me përgatitje më të mirë taktike dhe dukshëm superior në parket", thuhet fillimisht në reagimin e Partizanit.
Klubi i Partizanit gjithashtu kërkon mos rrezikohen basketbollistet e huaja që janë pjesë e ekipit.
"Përgënjeshtrojmë akuzat e bëra nga klubi kundërshtar apo media të ndryshme ku etiketohen basketbollistet tona si dhunuese dhe lojtaret e ekipit kundërshtar si viktima. Çështja do të ndiqet në çdo rrugë ligjore kundrejt personave dhunues dhe shkaktare të kësaj ngjarje të turpshme që nuk i kanë hije kryeqytetit të sportit. Shpresojmë që @albanian_basketball_federation si organizatore e kampionatit të vendosë drejtesinë në vend dhe mos të lejojë që faktorë të jashtëm apo klubi kundershtar me dashakeqesi të dëmtojë investimin tonë dhe të vendosë në rrezik lojtaret e huaja, te cilat kanë ardhur për të ushtruar sportin e basketbollit dhe jo dhunë", mbyll reagimin klubi i Partizanit në basketboll për femra.
Kujtojmë se Partizanit fitoi 86-83 në parket kundër Tiranës, duke kaluar në finalen e sezonit.
Lajmi kryesor:
VIDEO/ E paprecedentë në basketboll, grushta mes vajzave të Tiranës dhe Partizanit në derbi! Klubi i kuq: E ndjekim ligjërisht
S.DH/ReportTv.al