LONDER - Kryeministri britanik Keir Starmer po përpiqet të rindërtojë marrëdhëniet pas kaosit të shkaktuar më 28 shkurt në Shtëpinë e Bardhë. Ai është i angazhuar në atë që Downing Street e përshkruan si një "sprint diplomatik", me synimin për të parandaluar dobësimin e mbështetjes për Ukrainën dhe për të shmangur një përçarje të pakthyeshme mes SHBA-së dhe Europës.
Ndërkohë që liderët europianë kanë reaguar me zemërim ndaj trajtimit që Donald Trump i rezervoi Volodymyr Zelenskyt, Starmer ka zgjedhur të qëndrojë në heshtje deri në mbrëmje, kur zhvilloi telefonata me si presidentin amerikan, ashtu edhe me presidentin ukrainas, në një përpjekje për të ndërmjetësuar situatën. Përmbajtja e këtyre bisedave është mbajtur konfidenciale, por është e qartë se Londra synon të luajë rolin e një ure lidhëse midis Uashingtonit dhe Kievit, si dhe midis amerikanëve dhe europianëve.
Takimi në Londër dhe synimet e Starmer
Në këtë kontekst, samiti i planifikuar të dielën në Londër merr një rëndësi vendimtare. Fillimisht i konceptuar si një informim mbi takimet e fundit në Shtëpinë e Bardhë, ky takim tashmë shndërrohet në një moment kyç për të dhënë një përgjigje të parë ndaj tronditjes që Trump i ka shkaktuar rendit ndërkombëtar.
Më 2 mars, Starmer do të presë në Lancaster House – rezidencën historike të Foreign Office, ku janë xhiruar skena të Buckingham Palace në serialin “The Crown” – 16 liderë europianë si dhe Zelenskyn. Para samitit, ai do të zhvillojë dy takime bilaterale: një me presidentin ukrainas dhe tjetrin me kryeministren italiane Giorgia Meloni, e cila gjithashtu ka mbajtur kontakte të vazhdueshme me Trumpin.
Gjatë takimit, Starmer pritet të propozojë që vendet europiane të angazhojnë trupa në një kontingjent të përbashkët anglo-francez, që do të shërbejë si garantues i një paqjeje të mundshme në Ukrainë. Ai gjithashtu do të kërkojë rritjen e shpenzimeve ushtarake nga vendet e BE-së dhe krijimin e një “banke të riarmatimit” për financimin e mbrojtjes kolektive.
Strategjia britanike dhe marrëdhënia me Trump
Këto propozime shihen edhe si mënyra për të bindur Trumpin të mos tërhiqet plotësisht nga angazhimi amerikan në Europë. Starmer e forcoi këtë pozicion gjatë vizitës së tij në Shtëpinë e Bardhë, duke njoftuar rritjen e buxhetit të mbrojtjes së Britanisë në 2.5% të PBB-së, me synimin për ta çuar deri në 3%. Takimi mes Starmerit dhe Trumpit shkoi përtej pritshmërive, por presidenti amerikan nuk pranoi të angazhohej për një "backstop", një mekanizëm sigurie për mbrojtjen e kontingjentit europian që mund të vendoset në Ukrainë.
Megjithatë, Starmer synon të përdorë kapitalin politik të fituar në Uashington për të ndërmjetësuar midis Europës dhe SHBA-së. Brexiti, paradoksalisht, i jep Britanisë një avantazh diplomatik në këtë situatë: sipas Peter Mandelson, ambasadori i ri britanik dhe ish-këshilltari i Tony Blair, Londra mund të pozicionohet si një "urë" mes dy anëve të Atlantikut, duke përfituar nga fakti që nuk është më pjesë e BE-së.
Pavarësisht vështirësive të mëdha, strategjia britanike shihet si e vetmja rrugë për të shmangur shkatërrimin e aleancës perëndimore dhe, në fund të fundit, për të penguar fitimin e terrenit nga Vladimir Putin./ Corriere della Sera/
Komente
Po në fakt duket qartë dashuria Tramp Putin..
Përgjigju