SPAK po lejon që t’i dëmtohet reputacioni duke vendosur standarde të dyfishta si në proceset e saj hetimore, ashtu edhe në materialet që i rrjedhin apo i dalin nëpër media apo duart e politikanëve, ku njëherë nxjerr urdhër për bllokim publikimi dhe një herë tjetër nuk merr masa kur ato dalin në publik.
Problemi kryesor që ka SPAK-u aktualisht është mungesa e standardit dhe futja e drejtësisë në një anarki, që do ishte gjëja më e keqe për sistemin e një vendi. Kështu u shpreh sot gazetari Mero Baze, në një intervistë të dhënë sot (4 prill) për “Studio Live”, në Report Tv.
Ai u pyet për tematika të ndryshme të ditës nga moderatori Arbër Hitaj dhe veçanërisht publikimi në mediat e opozitës i përgjimeve të SPAK-ut ndaj bisedave të kryebashkiakut të arrestuar Erion Veliaj me familjarët, ku përmenden edhe emrat e tij dhe gazetarëve të tjerë.
“Nuk kam të vërtetë se çfarë ka ndodhur, nuk jam as i fyer dhe as i shqetësuar nga publikimi, por jam i keqardhur që përdoret një komunikimi personal i një personi të burgosur, këtë rast kryebashkiakut Erion Veliaj, me familjen e tij dhe përdoren për interesa të caktuara politike, për lincime dhe qëllime dashakeqëse. Por është keqardhje më shumë për SPAK, sesa për ata që janë përgjuar. Të përdorësh këtë përgjim, ta keqpërdorim ndaj një personi të caktuar, është të krijosh një anarki, e veçanërisht dëmtim të reputacionit të SPAK dhe drejtësisë. I vetmi shqetësim është dëmtimi i reputacionit të SPAK, e jo për ata që flasin në përgjime. Kush e përdor këtë apo keqpërdor duket e qartë se është opozita. Unë jam i shqetësuar vetëm për reputacionin e SPAK”, u shpreh ai.
Më tej shpjegoi edhe sjelljen me dy standarde të SPAK, që është edhe gjëja që shqetëson më shumë jo vetëm atë, por edhe opinionin publik.
“Çështja është a të botohen këto materiale apo jo? Nëse po, le të m’i sjellin mua se i botoj unë te gazeta ime. Por të krijohet një standard, nëse SPAK thotë se s’duhet të publikohen dhe më pas publikohen, apo veprohet ndryshe në raste të ndryshme, atëherë kemi një problem serioz. Nëse nuk lejohet të botohen, të merren masa, se është shkelur ligji. Nëse janë të botueshme sipas SPAK le të na i sjellin edhe ne, se i publikojmë. Kjo dëmton vetëm reputacionin e SPAK dhe askënd tjetër. Por kjo bëhet për të dëmtuar qëllimisht apo linçuar një person në paraburgim dhe familjen e tij”, vijon ai për Report Tv.
Por si ka ndodhur rrjedhja dhe çfarë dyshon gazetari?
“Nuk e përjashtoj mundësinë që klane brenda SPA janë pas kësaj historie dhe keqpërdorin njerëz që janë keqpërdorur gjithë jetën e tyre. Kjo është provë për SPAK, nëse SPAK mbron sekretin hetimor do të thotë i kanë rrjedhur materialet dhe duhet të hetojë ta zbulojë, në të kundërt është i përfshirë edhe vetë dhe ka një problem të rëndë edhe reputacioni. Prokurorë të ndryshëm të SPAK nuk kanë qëndrime të njëjta për çështje të njëjta, por i kanë të ndryshme. Por i dërgojnë materiale disa gazetarëve apo portaleve e delenxhinjve. Pra muhabete që flasin edhe në emër të SPAK, më tha SPAK mua, i thashë etj., nëse janë zëdhënës të SPAK le të na e thonë, se nuk është problem, e dimë atë punë. Pra SPAK le të na thotë se filan gazetar apo portal është zëdhënësi ynë, atëherë e dimë dhe i referohemi atij, e jo zëdhënësit që ka SPAK. Kjo është bërë banale tani dhe joserioze. SPAK duhet të ketë standarde të njëjta me të gjithë në publik. Nëse ka preferenca e referenca për linçim publik ndaj një apo tjetër personi, atëherë ky është një problem i vetë SPAK dhe i reputacionit të tij”, thekson Baze në reagimin e tij.
Gazetari shpjegoi se ai nuk ka sulmuar kurrë personalisht apo familjarisht një prokuror apo gjyqtar, por ka ngritur vetëm problematika dhe kritika për gjërat që nuk shkojnë në sistemin e drejtësisë. Por ai hedh dyshime të forta se segmente apo individë të caktuar po e fusin SPAK dhe drejtësinë në anarki.
“Nuk ka sulme të ngjashme, nuk barazohen sulmet personale të opozitës ndaj veprimtarisë së SPAK. Nuk kam bërë kurrë artikull që të lincoj prokurorë të SPAK apo ndaj familjeve të tyre. Kur ka diçka që nuk shkon me drejtësinë apo organet e saj, unë e kam për detyrë të flas dhe reagoj dhe ta them.
E përsëris edhe njëherë, SPAK duhet të ketë standarde të njëjta të barabarta për të gjithë për dosjet që heton apo çon në gjykim. Në të kundërt nuk mund të na bëjë statistika, për korrje gruri, mishi, prodhime, por të vendosë standarde dhe nuk mund të bëjë kundërpeshën me një kryebashkiak që pret pyllin dhe e dënon apo tjetrin që heq drejtorin në Shkodër dhe në anën tjetër të lësh të lirë një njeri që vrau 4 vetë në bulevard. Nuk ka rëndësi sesa njerëz heton dhe dënon SPAK, mund të hetojë të gjithë qeverinë apo politikën, por nëse nuk vendos standarde është e kotë. Ndryshe e fut në anarki pa standarde, anarkia më e keqe është ajo e drejtësisë pa standarde dhe madje është më e keqe se drejtësia e politizuar, si ajo e komunizmit.
Pra dihej ku ishte kufiri dhe kur dënoheshe, kurse tani nuk e dimë dhe ka standarde të ndryshme, futen në spirale drejtësia dhe madje ka anarki dhe anarkia në drejtësi është gjëja më e keqe për një vend. Unë mendoj se drejtësia duhet të vetëkorrigjohet dhe të shkojë drejt standardeve të njëjta, për çdo çështje që shkon në gjykatë, të rregullojë problemet dhe gjërat që i kanë munguar. Nëse ka probleme të tjera i takon Parlamentit pastaj. Por unë mendoj se drejtësia duhet të vendosë standarde”, paralajmëron dhe njëkohësisht sugjeron ai.
Në lidhje me ngjarjen e rëndë të harkimit të SPAK, për të cilin deri tani ka dy të arrestuar, Baze shprehet se prokuroria ka betejë të vështirë me krimin e organizuar, mafien dhe politikën dhe duhet të mbrohet mirë, ndaj edhe vlerësohen e mirëpaguhen. Ai nuk dyshon se ky sulm mund të jetë organizuar nga vetë SPAK.
“Nuk hyj te njerëzit që marr materiale ekskluzive nga SPAK, por është gjë shumë e rëndë. Por beteja e SPAK me krimin e organizuar dhe me mafien apo politikën është e vështirë, ndaj duhet të marrin masa mbrojtëse. Ndaj dhe janë kaq shumë të vlerësuar, mirëpaguar dhe me peshë. Nëse mbulojnë defektet e tyre me përgjime apo gjëra të tilla, do ishte shumë e rëndë për SPAK, ndaj nuk e mendoj se kjo vjen nga ana e SPAK”, thotë Baze.
Në lidhje me zvarritjen seancë pas seance të dosjes së aferës ‘Partizani’ ndaj Sali Berishës, dhëndrit të tij Jamarbër Malltezi dhe të tjerëve, gazetari vë në dukje se procese të tilla proceduriale janë ekskluzivitet i kryetarit të PD-së, duke kujtuar disa prej precedentëve.
“Historia e zvarritjes së çështjeve me avokatë është traditë e vjetër me të njëjtën mënyrë dhe nga i njëjti grupim, sikurse me rastin e Rrugës së Kombit ndaj Lulzim Bashës apo Gërdecit me Fatmir Mediun dhe djalin e Berishës, si dhe të tjerat. Kjo po ndodh me Berishën dhe dhëndrin e tij, është natyra e tyre kjo. Por ata mund ta lënë e zvarrisin, por kjo është një procedurë gjykate. Por tradita e shtyrjes së proceseve është ekskluzivitet i Sali Berishës”, vijon ai.
Madje shpjegoi se Berishës kjo taktikë i funksionon, sikurse intimidimi i prokurorëve apo gjyqtarëve personalisht apo nga familja. Por nënvizoi se përpjekja e Berishës për zhbërjen e reformës në drejtësi dhe shkrirjen e SPAK nuk do ketë sukses.
“Berisha ka kuptuar një gjë të thjeshtë, primitive dhe barbare, që nëse sulmon personalisht prokurorët e SPAK, familjen, babanë, vëllanë, dajën, hallën, gruan, atëherë kjo ka sukses. Retorika e tij është personale, lidhet me çështjet e tij dhe i sulmon prokurorët apo linçon dhe i ka funksionuar, ka pasur sukses. Sa i përket shkrirjes së SPAK ai nuk do e ketë kurrë mundësinë dhe shansin për të bërë atë, madje mendoj se Berisha është objekt i SPAK dhe ai nuk do e ketë mundësinë Kushtetuese për të bërë atë që thotë pasi procesi i reformës së drejtësisë nuk kthehet më”, thotë Baze.
Dhe në fund një mendim për hetimin e krimit elektoral nga SPAK dhe Prokuroria e Përgjithshme, për të cilën thotë si më poshtë se:
“Prokuroria të merret me gjëra serioze gjatë fushatës elektorale dhe jo të merret me gjëra banale e plotësuar statistika, duke hetuar tabela elektorale dhe deklarata fushate. SPAK të merret konkretisht me blerjen e votës, si dhe me ndërhyrjet te numërimi apo votimi. Tani procesi i zgjedhjeve është i dëmtuar pa nisur, për shkak të Diasporës, pasi është proces i hapur, i pakontrolluar dhe i cenuar, që në fakt e kemi bërë vetë me ligj e që duhet të merret parasysh si problem. Por brenda vendit SPAK duhet të veprojë të kapë në flagrancë, me blerje votash dhe prova konkrete, e jo të ndodhë si me rastin e Dibrës ku prokurorët dolën pas 4 vite dhe e pushuan çështjen pasi përbaltën procesin duke nxjerrë përgjime në media. Pra SPAK të veprojë në kohën e duhur me përgjimet që bën dhe të veprojë me prova, duke goditur”.
Komente
O Mero Baze SPAKU ēshtē vegēl qorre e Sali Bajgēs. E Edi Rama ēshtē ortaku i Sali Bajgēs ēshtē e kot tē diskutohet. Prandaj hikin Shqiptarēt nga syt kēmbēt.
Përgjigju