Zëdhënësi i Shërbimit Europian për Punë të Jashtme, Peter Stano, mohoi njoftimin e disa mediave në Serbi se Bashkimi Europian është duke përgatitur një ultimatum për Beogradin, në raundin e ardhshëm të bisedimeve me Prishtinën, që do të mbahet më 30 korrik në Bruksel.
“Me rregull, ne nuk i komentojmë spekulimet e mediave, por në rastin konkret dua t’i mohoj qartazi spekulimet rreth raundit të nesërm të bisedimeve midis ekspertëve dhe axhendës së tyre”, tha Stano
Dialogu midis Kosovës dhe Serbisë, i cili ka rinisur në nivelin më të lartë më 16 korrik, vazhdon me një seri të takimeve në nivel ekspertësh, që janë pjesë e procesit.
Në takimin e ditës së nesërme, në rend të ditës pritet të jetë bashkëpunimi ekonomik.
Gazeta serbe “Veçernje Novosti” ka shkruar se delegacionit të Beogradit, i cili të enjten udhëton drejt Brukselit për bisedime me të dërguarin e BE-së në dialogun Kosovë-Serbi, Mirosllav Lajçak, dhe me delegacionin e Kosovës, do t’i dorëzohet një draft-marrëveshje gjithëpërfshirëse, e cila nënkupton njohjen de fakto të Kosovës nga ana e Serbisë.
Beogradi nuk është në dijeni se draft-marrëveshja gjithëpërfshirëse do t'iu dorëzohet delegacioneve të Beogradit dhe Prishtinës të enjten në Bruksel, tha ministri i Jashtëm serb, Ivica Daçiç.
Daçiç tha se është i bindur se nëse ka një propozim të tillë, presidenti i Serbisë, Aleksandër Vuçiç, do të përgjigjet në përputhje me interesat shtetërore dhe kombëtare.
Ai tha se pala serbe nuk është e informuar për ndonjë dokument që do të jetë në rend dite të enjten. Sipas tij, në tryezë të bisedimeve do të jenë çështje teknike, si ajo e të zhvendosurve dhe ekonomia.
Daçiç gjithashtu tha se rezultati i çdo marrëveshjeje do të duhet të kalojë në Këshillin e Sigurimit të Kombeve të Bashkuara, që do të thotë se të gjitha fuqitë e mëdha do të duhet të japin mendimin e tyre për të.
Delegacioni i Kosovës në bisedimet e nivelit të ekspertëve kryesohet nga koordinatori shtetëror për dialogun me Serbinë, Skender Hyseni, ndërsa ai i Serbisë nga drejtori i Zyrës për Kosovën në Qeverinë e Serbisë, Marko Gjuriç.
