Presidenti Bajram Begaj në një vizitë në Bashkinë e Lushnjës u njoh me zhvillimin dhe problematikat e ekonomisë bujqësore në zonën e Myzeqesë. Kreu i Shtetit vlerësoi po ashtu edhe banorë të zonës që janë kthyer nga Italia, Greqia apo Gjermania dhe po investojnë në tokat e tyre me kultivimin e ullinjve e të produkteve bujqësore, me fabrika e serra të teknologjisë së fundit.
“Erdha për t’ju thënë faleminderit! Djersa, puna juaj, e ka bërë këtë vend të bukur, të mrekullueshëm! Duhet të vijmë më shpesh, t’ju takojmë, t’ju dëgjojmë e t’ju ndihmojmë. Ju të gjithë, burra e gra, që punoni me ndershmëri, jeni krenaria jonë”, u shpreh Presidenti Begaj.
Presidenti i Republikës i nxiti këta sipërmarrës të ndërtojnë modele agroturizmi që të arrijnë përfshirjen e kësaj zone të mrekullueshme nga natyra dhe dora e njerëzve të saj punëtorë në hartën e pikave turistike të vendit.
Presidenti Begaj përshëndeti, gjithashtu, edhe nismat e komunitetit për organizimin e përbashkët në shoqëri dhe shoqata për të konkurruar në treg me markat e tyre.
