Policia ka arrestuar dy italianë për kontrabandë floriri të rremë e të pastër, si edhe një shqiptar, pronar argjendarie, i cili tentoi të fshihte krimin.
Fortunato Maddaloni, 67 vjeç, banues në Napoli dhe Riccardi Gennario, 76 vjeç, banues në Milano përzienin floririn me metale të tjera dhe gjatë periudhës qershor-gusht 2022, e kanë shitur me vlerë 200 000 euro në Tiranë dhe Podgoricë.
Arrestimi i tyre u bë në Elbasan dy ditë më parë, ndërsa sot u arrestua edhe argjendari shqiptar që deshi të fshihte krimin.
Policia sekuestroi 3 kilogramë ar i dyshuar si i rremë, 160 gramë ar i pastër, 4 aparate celulare, 1500 euro dhe 150 franga zviceriane.
Dy italianët akuzohen për "Kontrabandë me mallra të licencuara" dhe "Mashtrim" të kryer në bashkëpunim, ndërsa 53-vjeçari J.T. nga Elbasani akuzohet për "Veprime që pengojnë zbulimin e së vërtetës".
Materialet hetimore i kaluan Prokurorisë, për veprime të mëtejshme procedurale.
