Etrit Berisha, portieri i kombëtares shqiptare, nuk do të jetë më pjesë e Atalantës pas 3 sezonesh me bergameskët. 30-vjeçari ka firmosur sot me klubin e Spal pasi këta të fundit kanë arritur akord me Atalantë në bazë të formulës së huazimit me të drejtë blerje sezonin e ardhshëm.
Lajmi është konfirmuar nga të dy klubet, ndërsa në lajmërimin e Atalantës thuhet: ‘Njoftojmë se klubi ka huazuar futbollistin Etrit Berisha me të drejtën e largimit përfundimtar. Atalanta falenderon portierin për angazhimin, seriozitetin dhe kontributin e çmuar në këto tre vite për arritjen e objektivave të rëndësishme. Paç fat Etrit.”
Pas dy sezoneve si titullar Etrit Berisha në të fundit e nisi si i padiskutueshëm te Atalanta, por gjatë rrugës italiani Gollini fitoi besimin e trajnerit Gasperini. Gjithsesi me kalimin te Spal Etrit pritet të jetë i padiskutueshëm në portë, ndërsa klubi do të tentojë sërish për mesin e tabelës në “Seria A”.
Kjo për Berishën do të jetë aventura e tretë në kampionatin elitar të Italisë pas transferimit të Lazio në verën e vitit 2013.
Komente
