Sali Berisha thotë se me ardhjen e tij në pushtet nuk do të ketë asnjë tarifë mbi mallrat që vijnë nga Amerika. Kështu ai shpreson që Donald Trump të heqë tarifat doganore mbi mallrat shqiptar, por Berisha nuk artikulon se në ç’formë do të bëhen diskutimet me Trump, kur edhe administrata e tij ka mbajtur të njëjtin qëndrim si ajo e mëparshme mbi non gratën e tij.
Gjatë fjalës së tij në konferencën e Sindikatave të Bashkuar deklaroi se Shtetet e Bashkuara të Amerikës vendosën tarifa për shkak të reciprocitetit. Sipas kreu të selisë blu, shqiptarët dhe kushdo duhet të dijë të vërtetën “të gjithë ata që ankohen sot, më parë kanë pasur tarifa kundër SHBA-së”.
“Ne do bëjmë gjithçka që Made in Albania të mbushë tregjet shqiptare dhe tregjet e botës. SHBA kanë vendosur një sistem tarifash sepse të gjithë kanë pasur tarifa ndaj tyre. Kjo është e vërteta. Ta mësoni të vërtetën. Të gjithë këta që qahen sot, kanë pasur tarifa.
Shqipëria nuk do ketë asnjë tarifë për mallrat amerikane dhe jam i bindur se kjo gjë do ndodhë edhe me qeverinë e SHBA pasi t’i heqim ne. Edhe njëherë, u garantoj për një partneritet luajal dhe zëri juaj, avokat i fuqishëm i njerëzve të punës, do jetë një zë që do dëgjohet nga qeveria.
Dhe nuk do mburret si ai që del nëpër botë dhe thotë ne nuk kemi sindikata. Nuk ka sindikata se nuk pyet për to ai. Kurse ne do u dëgjojmë ju, do bashkëpunojmë me ju, do marrim parasysh interesat tuaja dhe do shndërrojmë Shqipërinë në Shqipëri Madhështore, në Shqipërinë e ëndrrave të fëmijëve tanë”, tha Berisha.
Sali Berisha bëhet i vetmi politikan europian, që mbron tarifat amerikane kundër Europës, dhe për më tepër kundër vendit të vet.
Komente
