Sali Berisha mblodhi sot moshën e tretë, pensionistët, duke u qarë hallin dhe shpjeguar atyre se si bashkëmoshatar i kupton më mirë sesa kryeministri Edi Rama, edhe pse gjatë tetë viteve në qeveri (2005-2013) mund të kishte realizuar premtimet për pagesë me standarde europiane.
Kreu i selisë blu premtoi zgjidhje brenda tre muajve të qeverisjes nëse do fitojë më 11 maj, duke e çuar në 200 euro pensionin minimal.
“Ata sot janë pa diskutim shtresa më në nevojë që përballen me dhimbjet e përditshme dhe jo pak prej tyre, qajnë çdo ditë me lot të ftohta mjerimi. Unë premtoj sot se pensionistëve shqiptarë të gjitha padrejtësitë marrin fund brenda 3 muajsh. Vendosim minimumin 200 euro”, tha Berisha.
Kryetari i PD nuk u ndal këtu, teksa foli edhe më vonë për pensionistët nga selia blu, gjatë një konference të zakonshme për mediat.
“Pensionistët kërkojnë jo udhëtim falas, por me gjysmë çmimi, dhe unë u premtoj atyre udhëtim me gjysmë çmimi në të gjithë Shqipërinë. Pensionistët do kenë të drejtë të analizave bazë, falas çdo 6 muaj”, shtoi Berisha.
I pyetur mbi faturën financiare të programit të tij elektoral, ku flet jo vetëm për ulje taksash por rritje të mbështetjes financiare në shumë sektorë, pa dhënë shifra konkrete, Berisha garantoi se gjithçka është e përballueshme, por pa shpjeguar me shifra se ku do gjendeshin këto para, duke thënë vetëm se do gjenden nga vjedhjet e mëdha që bëhen nga qeveria e tanishme.
“Këto para, para së gjithash do të dalin nga vjedhjet e mëdha që bëhen. Burimi i dytë i madh ku do të merren këto para dhe është shumë e drejtë, është se ne e kemi faktuar se ulja e taksave shton të ardhurat. Por burimi më kryesor i të ardhurave për përmbushjen e premtimeve janë realizimi i punëve publike me çmimet ndërkombëtare”.
Komente
Uuuuuu cna gjeti tani u kujtua ky cmendaraku
Përgjigju