TIRANË - Të shtunën (1 mars) në mbrëmje Besëlidhja e basketbollit për meshkuj siguroi fitoren e 15-të radhazi në kampionat. Lezhjanët mposhtën 73-88 Tiranën në sallën sportive 'Farie Hoti' në kryeqytet.
Besëlidhja e Afrim Bilalit dominoi në të katërta periodat, duke treguar se këtë sezon titullin kampion mund ta humbasë vetëm vetë. Në çerekun e parë lezhjanët fituan 17-21, teksa në të dytin 17-19, duke mbyllur pjesën e parë me gjashtë pikë epërsi.
E njëjta 'melodi' vijoi edhe në çerekun e tretë, aty ku Tirana u mposht 25-32. Perioda e fundit foli sërish për Besëlidhjen 14-16 dhe me rezultatin final 73-88 u mbyll ndeshja në parket.
Paçka humbjes, më i miri në fushë me 18 pikë e shtatë kërcime në tabelë ishte Endrit Hysenagolli i Tiranës. Për Besëlidhjen Marcellus Garricks shënoi 16 pikë, Xhersido Hajdari 14 pikë dhe Joshua Angle 13 pikë.
Ndërkohë në ndeshjet e tjera të meshkujve, Teuta fitoi me Kamza Basket 92-76, ndërsa java përfundon sot me ndeshjen Apolonia - Vllaznia.
Komente
