Një blackout masiv ka goditur të gjithë Spanjën kontinentale, Portugalinë dhe pjesë të jugut të Francës rreth orës 12:30 të ditës së sotme, ndërsa energjia ka nisur që të rikthehet në disa zona.
Ndërprerja e energjisë elektrike mësohet se u shkaktua nga një defekt në rrjetin spanjoll të energjisë elektrike, i lidhur me një "fenomen të rrallë atmosferik", sipas asaj që raporton kompania portugeze e energjisë Rede Eletrica Nacional.
Edhe pse fillimisht u raportua se mund të ishte si pasojë e një sulmi kibernetik, Agjencia e Bashkimit Evropian për Sigurinë e Informacionit (ENISA), tha se hetimet fillestare tregojnë se ka pasur një problem teknik dhe jo një sulm kibernetik.
"Hetimi deri më tani duket se tregon se është një çështje teknike ose kabllore. Megjithatë po monitorohet nga afër situata dhe jemi në kontakt me autoritetet kompetente në nivel kombëtar dhe komunitar’, tha ai.
Blackout-it preki një zonë me rreth 60 milionë banorë dhe është padyshim më i rëndi në historinë e fundit të Spanjës dhe Portugalisë.
Qeveria e Madridit dhe ajo e Lisbonës thirrën mbledhje emergjente, përkatësisht në selinë e Red Eléctrica dhe në rezidencën e kryeministrit për të koordinuar përgjigjen ndaj blackout-it. Edhe Komisioni Evropian është në kontakt me Spanjën për të përcaktuar shkaqet e ndodhjes.
Një grafik i operatorit spanjoll të rrjetit Red Eléctrica Nacional tregon rënien drastike të konsumit në orën 12:30 fikse. Red Eléctrica deklaroi se mund të duhen deri në 6-10 orë për rikthimin në normalitet.
Paraliza dhe kaosi në transport dhe linjat e komunikimit
Pasojat ishin të menjëhershme dhe shumë të rënda.
Linjat telefonike u ndërprenë në të gjithë Spanjën dhe Portugalinë. Sistemi hekurudhor u paralizua dhe rrjeti kombëtar spanjoll njoftoi se të gjithë trenat ndalun në stacione.
U prekën gjithashtu aeroportet e Barajas në Madrid dhe ai i Lisbonës në Portugali, ndërsa metrotë e Madridit dhe Barcelonës u ndalën. Trafiku në kryeqytet u kthye në kaos, ndërsa shqetësime u raportuan gjithashtu në Sevilje, Barcelonë, Valencia, Pamplona dhe në pjesën tjetër të vendit.
Autoriteti spanjoll i trafikut i ka bëri thirrje popullsisë të mos përdorë automjetet përveç rasteve të domosdoshme.
Ministria e Brendshme spanjolle ngriti një ekip krize me prioritet evakuimin e njerëzve të bllokuar në metrotë dhe trenat, shumica e të cilëve në tunele, si dhe në ashensorët e ndërtesave publike dhe private, për shkak të blackout-it.
Spitalet në Komunitetin e Madridit raportuan se po vazhdojnë të funksionojnë normalisht, por vetëm falë gjeneratorëve të energjisë: «Aktivitetet e zakonshme spitalore janë pezulluar aty ku është e nevojshme.
Pesë centralet bërthamore të Spanjës kanë ndalur prodhimin e energjisë për arsye sigurie; impiantet po përdorin gjeneratorë për të mbajtur aktivizuar sistemet e brendshme të sigurisë, që duhet të jenë gjithmonë funksionale.
Presidentja e Komunitetit të Madridit, Isabel Díaz Ayuso, i ka kërkuar kryeministrit spanjoll Pedro Sánchez të aktivizojë nivelin e emergjencës 3, në mënyrë që ushtria të mund të ruajë rendin, nëse do të jetë e nevojshme.
Ndikimi në Masters 1000 të Madridit
Edhe turneu Masters 1000 në Madrid është prekur nga blackout-i: disa ndeshje, përfshirë atë të italianit Matteo Arnaldi, janë ndërprerë.
Dëshmia nga Lisbona
Raffaele Foschini, student italian në Lisbonë, tregoi për Corriere della Sera se në qytet semaforët janë jashtë funksionit, dyert me kod të godinave të banimit janë bllokuar dhe bankomatët janë çaktivizuar: 'E vetmja gjë që ende funksionon janë celularët për sa kohë të zgjasë bateria'.
Përpjekjet për rikthimin e rrjetit në Spanjë dhe Francë
Rreth orës 13:40, Red Eléctrica njoftoi se kishte nisur rikthimin e furnizimit me energji nga veriu dhe jugu i Gadishullit Iberik.
Sipas gazetës portugeze Expresso, operatori portugez i rrjetit, E-Redes, deklaroi se ndërprerja e energjisë u shkaktua nga një problem me sistemin elektrik evropian, dhe se ishin detyruar të ndërprisnin energjinë në zona të caktuara për të stabilizuar rrjetin.
Në Francë, zonat ku ishte ndërprerë energjia u kthyen në normalitet pak pas orës 14:10.
Situata në Itali dhe për qytetarët italianë
Ministri i Jashtëm, Antonio Tajani, nga Valencia në Spanjës ku ishte për një takim me sipërmarrës italianë dhe për kongresin e PPE-së ka bërë të ditur se është në kontakt me ambasadorin italian dhe me konsullatat në Madrid dhe Barcelonë për të ndjekur situatën.
'Qytetarët italianë janë kontaktuar nga konsullatat dhe nga Njësia e Krizave në Romë përmes mesazheve që mund të mos kenë mbërritur ende në telefonat celularë', njoftoi Ministria e Jashtme.
Ndërkohë, kompania italiane që menaxhon rrjetin kombëtar, Terna, bëri të ditur se aktualisht nuk ka asnjë problematikë operative në rrjetin italian të transmetimit të energjisë.
lajmi në përditësim...
Pas ndërprerjes së energjisë elektrike në Spanjë, Portugali dhe Francën jugore, në disa zona ka nisur që të rikthehet energjia.
Sipas Agjencisë së Bashkimit Evropian për Sigurinë e Informacionit (ENISA), hetimet fillestare për shkakun e ndërprerjeve të energjisë elektrike në Spanjë, Portugali dhe Francën jugore kanë treguar se ka pasur një problem teknik dhe jo një sulm kibernetik, sipas La Repubblica.
"Hetimi deri më tani duket se tregon se është një çështje teknike ose kabllore. Megjithatë po monitorohet nga afër situata dhe jemi në kontakt me autoritetet kompetente në nivel kombëtar dhe komunitar’, tha ai.
Ndërkohë, edhe kryeministri portugez Luis Montenegro deklaroi se nuk ka indikacione për sulm kibernetik.
‘Nuk ka asnjë tregues se ndërprerja e energjisë elektrike që preku kryesisht Spanjën dhe Portugalinë ishte shkaktuar nga një sulm kibernetik', tha ai.
Ndërprerja e energjisë ka shkaktuar kaos edhe në biznese
Rreth një orë pas ndërprerjes së energjisë në Spanjë, Google Maps tregoi nivele zonash të kuqe të trafikut në rrugë të gjata të rrugëve kryesore në disa qytete, si aksi Castellana-Prado-Recoletos, i cili shkon nga veriu në jug në Madrid, ose rrugët e rregulluara nga semaforët, si Príncipe de Vergara ose Gran Vía, siç është rasti në Barcelonë ose Sevilje.
Shumë kompani kanë vendosur të dërgojnë punonjësit e tyre në shtëpi, për shkak të pamundësisë për të vazhduar ditën e tyre të punës.
Por jo vetëm kaq, sepse më e keqja kanë qenë plaçkitjet, kryesisht në supermarkete dhe bizneset me hapësira dhe frekuentim të madh.
Vjedhje masive në supermarkete dhe disa dyqane u raportuan, si pasojë e errësirës dhe kaosit të krijuar.
“Disa dyqane luksoze në qendër të Madridit mbyllën dyert e tyre nga frika e vjedhjes dhe plaçkitjes. Megjithatë, ata që kanë mbetur të hapur duket se vuajnë nga vjedhjet dhe plaçkitjet”, raporton media spanjolle "Marca”.
Shërbimi 112 në komunitete autonome si Madridi dhe Castilla León, ndër të tjera, këshillon që 112 duhet të përdoret vetëm për thirrje urgjente.
Kompanitë e energjisë elektrike ende nuk kanë dhënë asnjë deklaratë në lidhje me ngjarjen, por po hetojnë shkaqet e ndërprerjes, mes tyre si pistë kryesore mbetet hakimi kibernetik. Ndërprerjet shtrihen në Portugali, Francë, të gjithë Spanjën, Andorrën dhe vende të tjera të botës.
Moment nga 'blackout'-i në Spanjë, forcat e sigurisë dhe qytetarët në kaos
Nuk ka ende një përgjigje zyrtare, por teoritë, duke përfshirë ato më konspirative, kanë filluar të dalin.
Spanja, Portugalia dhe vende të tjera evropiane janë pa energji për shkak të ndërprerjes së gjerë dhe lind pyetja e madhe: Në mungesë të ngjarjeve ekstreme të motit, cili është shkaku i mundshëm i ndërprerjes?
Juanma Moreno, Presidente e Qeverisë Rajonale Andaluziane u tha mediave se pavarësisht se nuk kishte asnjë komunikim nga qeveria apo ndonjë siguri, "vetëm bazuar në të dhënat nga Andaluzia, një ndërprerje e kësaj natyre mund të ishte një sulm kibernetik".
Në këtë linjë, një dështim në një nënstacion ose linjë energjie mund të shkaktojë ndërprerje kaskadë që prekin disa qytete ose lagje të tëra. Një qark i shkurtër, një dështim i izolimit ose një dështim i thjeshtë mekanik në një transformator mund të jetë i mjaftueshëm për të shkaktuar ndërprerje, edhe pa shkaqe meteorologjike, informon 'Marca'.
Për momentin nuk dihet nëse ky është shkaku. Sulmet kibernetike: Hakimet e synuara kundër sistemeve elektrike, janë një shqetësim i madh për qeveritë dhe kompanitë e energjisë.
Qeveria spanjolle ka nisur një hetim për këto ndërprerje, duke shfrytëzuar ekipe teknike nga disa ministri. Deri më tani, autoritetet nuk kanë dhënë asnjë shpjegim për ngjarjen. Instituti Kombëtar i Sigurisë Kibernetike (INCIBE) po analizon gjithashtu situatën për të përcaktuar nëse mund të jetë një sulm kibernetik, por deri më tani nuk ka arritur në ndonjë përfundim.
Por ka dhe shumë faktorë që mund të shkaktojnë një dështim të rrjetit të energjisë: mbingarkesat, qarqet e shkurtra, dështimet e nënstacionit ose problemet me linjat e tensionit të lartë. Një arsye tjetër mund të lidhet me konsumimin e infrastrukturës: pajisjet e vjetra ose të mirëmbajtura keq mund të dështojnë papritur, edhe për shkak të gabimit të mundshëm njerëzor.
Spanja ka një rrjet të gjerë dhe kompleks të energjisë elektrike, i operuar kryesisht nga Red Eléctrica de España (REE) për transmetim dhe nga kompani të ndryshme shpërndarjeje (Endesa, Iberdrola, Naturgy, etj.). Ngjarjet ekstreme të motit: stuhi, rrufe, uragane, valë të nxehti ose të ftohta intensive që dëmtojnë infrastrukturën.
Komente
