Tony Blair është i interesuar të luajë një rol kyç menjëherë pas përfundimit të konfliktit në Gaza. Kjo dihet me siguri të paktën që nga 27 gushti i kaluar, dita kur ish-kryeministri britanik mori pjesë në një takim në Shtëpinë e Bardhë të organizuar nga Jared Kushner, dhëndri i Donald Trump, i cili gjatë mandatit të parë presidencial të këtij të fundit ishte këshilltari i tij për Lindjen e Mesme dhe që më pas ka mbajtur një zë ndikues edhe më tej. Steve Witkoff, i dërguari i posaçëm i presidentit të Shteteve të Bashkuara, i cili – ashtu si Kushner para tij – është i ngarkuar të menaxhojë disa dosje delikate mes të cilave edhe atë ukrainase dhe, pikërisht, atë të Lindjes së Mesme, në margjinat e atij takimi tha se ajo që po përgatitej ishte "një plan shumë i gjerë".
Por sot Financial Times zbulon (dhe BBC e konfirmon) se Blair-it i është kërkuar, me mbështetjen e Shtëpisë së Bardhë, që të kryesojë personalisht Autoritetin Ndërkombëtar Kalimtar të Gazës (GITA), organin kolegjial të planifikuar që do të duhet të administrojë Gazën duke filluar nga “një ditë më pas” – pra nga momenti kur armiqësitë do të ndalen dhe njerëzit e Hamas do të detyrohen të largohen nga vendi i ngjarjes.
Sipas një rindërtimi të detajuar të publikuar nga Times of Israel, plani që Blair po përpiqet të përpunojë në javët e fundit përmes një agjende të ngjeshur takimesh me ndërmjetës nga vende të ndryshme dhe duke konsultuar të gjitha palët e përfshira – një plan që do të kishte marrë mbështetjen e Trump, por ende jo atë të qeverisë së drejtuar nga Benjamin Netanyahu – parashikon që në GITA të bëjnë pjesë rreth dhjetë persona: një funksionar i lartë i propozuar nga Kombet e Bashkuara, përfaqësues të vendeve më të rëndësishme myslimane, disa figura me peshë ndërkombëtare dhe me përvojë të madhe menaxheriale e financiare dhe, për të garantuar njëfarë pjesëmarrjeje të Autoritetit Palestinez të Abu Mazenit, të paktën një përfaqësues i respektuar palestinez, mundësisht me profil më shumë teknokrat sesa politik.
Plani i Blair nuk do të nënkuptonte zhvendosje të detyruara ose "vullnetare" të popullsisë së Gazës drejt rajoneve të tjera, ndryshe nga disa projekte të tjera post-lufte më të pamëshirshme, si ai i "Riviera e Gazës", që është parashikuar nga Trump – në hartimin e të cilës, duket se, kanë bashkëpunuar edhe disa anëtarë të stafit të Institutit Tony Blair për Ndryshim Global, organizata jofitimprurëse e themeluar nga ish-kryeministri britanik që ofron konsulencë për qeveri të ndryshme anembanë botës.
Blair, i cili që në vitin 2007 ishte emëruar i dërguar i posaçëm nga i ashtuquajturi Kuarteti për Lindjen e Mesme (i përbërë nga OKB, Shtetet e Bashkuara, Bashkimi Europian dhe Rusia), ka shumë ndërmjetës dhe lidhje të hershme në atë zonë të botës, por ende bart një farë mosbesimi nga bota arabe për faktin se ishte një nga promovuesit më të zjarrtë të ndërhyrjes në Irakun e vitit 2003: edhe për këtë arsye, emërimi i tij si një lloj "guvernatori" i Gazës menjëherë pas përfundimit të konfliktit do të ishte mjaft i bujshëm.
As Shtëpia e Bardhë dhe as Instituti Tony Blair për Ndryshim Global nuk kanë komentuar mbi zbulimet e mediave britanike lidhur me rolin që ky i fundit mund të kishte në GITA. Por Financial Times thekson se mundësitë reale të suksesit të tij do të maten me më shumë saktësi vetëm të hënën e ardhshme, dita kur Trump do të takohet me Netanyahun në Uashington. Dhe, nëse kryeministri izraelit do të shfaqte një kundërshtim të plotë ndaj “planit Blair”, atëherë do të mund të kuptohet (ndoshta) se sa shumë është i vendosur Trump të ushtrojë një presion të vërtetë mbi aleatin./Corriere della sera
Komente
Ktij vendi i duhet gjithmone Ponc Pilati
Përgjigju