Shitja e biletave për finalen e Conference League në Tiranë ka përfunduar që me datë 10 maj nga UEFA, por në tregun e zi ato kanë ridalë me shifra stratosferike. Në një njoftim vihet re se dikush që nuk është tifoz as i Romës dhe Feyenord ka siguruar dy bileta të kategorisë së 3 në stadiumin Air Albania dhe kërkon t’i shesë 10 fish më shtrenjtë.
Në njoftimin e UEFA çmimet për kategorinë e tretë ishin 45 euro, ndërsa në njoftimin në fjalë shiten për 500 euro. Shpeshherë UEFA ka bërë thirrje për kujdes me biletat që blihen në tregun e zi, pasi janë të falsifikuara.
Ndërkohë në ‘ebay’ mund të gjenden bileta për finalen e Tiranës me çmime të ndryshme, që variojnë nga 605 euro, 705 euro dhe deri në 1.500 euro. Bileta më e lirë sipas ndarjes së UEFA-s ishte 25 euro në kategorinë e katërt, ndërsa më e shtrenjta 125 euro në kategorinë e parë.
