Qeveria federale e SHBA është mbyllur zyrtarisht të mërkurën, pasi demokratët në Kongres refuzuan të mbështesin një projektligj republikan për financimin e përkohshëm të qeverisë, duke kërkuar një sërë lëshimesh që lidhen me kujdesin shëndetësor. Partia Republikane, e cila kontrollon Senatin dhe Dhomën e Përfaqësuesve, i hodhi poshtë kërkesat e tyre, duke shkaktuar një përplasje legjislative, dhe Senati dështoi të avanconte me projektligjet e të dyja partive për të vazhduar financimin.
Republikanët rrëzuan me 53 vota pro dhe 47 kundër propozimin e opozitës për të zgjatur përfitimet e Obamacare, të cilat do të skadojnë në fund të vitit, dhe për të anuluar shkurtimet e tjera të kujdesit shëndetësor të bëra nga Projektligji “One Big Beautiful” i Donald Trump.
Mbyllja e qeverisë vjen pas mbylljes 35 ditore në dhjetor 2018 dhe u zgjat deri në vitin e ri, gjatë mandatit të parë të Donald Trump. Kryetari i pakicës në Senat, demokrati Chuck Schumer, e akuzoi shumicën republikane për "shtyrjen e vendit në një krizë të panevojshme", duke theksuar se refuzimi për të negociuar për çështje jetike si kujdesi shëndetësor ka pasoja të rënda për qytetarët amerikanë.
Në thelb të mosmarrëveshjes janë kërkesat e demokratëve për të zgjatur kreditë tatimore për planet e Kujdesit të Përballueshëm (ACA), për të ndaluar shkurtimet në Medicaid dhe për të parandaluar përdorimin e fondeve federale për politikë të jashtme sipas dëshirës së presidentit Trump. Kostoja totale e këtyre kërkesave arrin në rreth 1 trilion dollarë, ndërsa miliona amerikanë përballen me rrezikun e humbjes së sigurimit shëndetësor.
Nga ana tjetër, udhëheqësit republikanë kërkojnë miratimin e financimit të qeverisë pa përfshirë kërkesa të reja, duke akuzuar demokratët për bllokim politik. “Grupet ekstremiste të së majtës po mbajnë peng financimin e qeverisë,” tha udhëheqësi i shumicës në Senat, John Thune.
Presidenti Donald Trump reagoi duke paralajmëruar shkarkime masive të punonjësve federalë, duke deklaruar se shumica e tyre janë demokratë. “Kur e mbyll qeverinë, vijnë pushimet nga puna,” tha ai të martën.
Disa senatorë demokratë devijuan nga qëndrimi i partisë. Tre anëtarë votuan pro projektligjit republikan, duke shprehur shqetësim për fuqizimin e mëtejshëm të administratës Trump gjatë një mbylljeje qeveritare. Senatorja Catherine Cortez Masto deklaroi se nuk mund të mbështeste një mbyllje që "dëmton familjet e Nevadës" dhe "i jep më shumë pushtet një administrate të papërgjegjshme".
Ndërsa negociatat që pritet të rifillojnë, republikanët kanë planifikuar një raund të ri votimesh në Senat mëngjesin e së mërkurës, duke lënë hapur mundësinë për një kompromis – megjithëse palët vazhdojnë të mbeten larg në qëndrimet e tyre. Në këtë krizë që mund të zgjasë për ditë apo javë, mijëra punonjës federalë do të mbeten pa paga, shërbimet publike do të ndërpriten pjesërisht dhe pasiguria politike do të thellohet.
Mbetet për t’u parë se kush do të përkulë i pari në këtë betejë që kërcënon të dëmtojë si ekonominë ashtu edhe besimin e publikut ndaj institucioneve qeveritare.
Çfarë ndodh gjatë mbylljes?
Dyzet përqind e punonjësve publikë federalë - rreth 800,000 njerëz - do të mbeten pa punë për një kohë të pacaktuar. Duke filluar me transportin. Udhëtimi ajror konsiderohet një shërbim thelbësor dhe për këtë arsye nuk do të pezullohet. Por punëtorët në sektor që varen nga qeveria federale nuk do të paguhen, edhe pse duhet të punojnë gjithsesi. Në përgjithësi, punonjësit e qeverisë federale (domethënë, jo, për shembull, punonjësit shtetërorë) nuk do të marrin paga gjatë mbylljes së qeverisë. Gjatë mbylljeve të mëparshme, shumë prej tyre gjetën punë të dyta dhe shumë të tjerë u paguan në mënyrë retroaktive. Për Donald Trump, i cili ka bërë thirrje për shkurtime që nga dita e tij e parë në detyrë, kjo është një mënyrë për të zvogëluar stafin e ngjashme me atë që përdorin shumë kompani: kushte të pamundura, pranoje ose lëre.
Disa agjenci, të tilla si Qendrat për Kontrollin dhe Parandalimin e Sëmundjeve dhe Institutet Kombëtare të Shëndetit, ka të ngjarë të pushojnë nga puna shumë punëtorë, duke ndikuar në kërkimet dhe eksperimentet e vazhdueshme. Parqet dhe pyjet kombëtare ishin të mbyllura për vizitorët gjatë mbylljeve të mëparshme; rojeve të pylltarisë dhe punonjësve të tjerë iu kërkua të qëndronin në shtëpi.
Gjatë mbylljes së fundit, administrata Trump vendosi t'i linte parqet të hapura, me pak ose aspak punonjës federalë për t'i menaxhuar ato. Sipas avokatëve të parqeve, vendimi çoi në akte vandalizmi, ndërsa vizitorët kalonin me makinë nëpër peizazhe të mbrojtura, plaçkitnin vende historike dhe hidhnin mbeturina në mënyrë të pakontrolluar. Një grup prej mbi 40 ish-drejtorësh parqesh më pas i bënë thirrje Shtëpisë së Bardhë t'i mbyllte ato plotësisht gjatë një mbylljeje të ardhshme.
Kujdesi shëndetësor dhe shërbimet sociale janë veçanërisht në rrezik: pikërisht në këtë pikë - për vazhdimin e pagesave që Trump dëshiron të shkurtojë - nuk ka marrëveshje në Uashington, dhe kjo pikë është veçanërisht e prekur nga "mbyllja". Medicare dhe Medicaid, programet e ndihmës sociale për të moshuarit dhe të varfrit, do të vazhdojnë, por mungesa e stafit mund të shkaktojë ndërprerje në disa shërbime. Përpjekjet për ndihmë emergjente pas fatkeqësive natyrore nuk do të ndikohen ndjeshëm, ndërsa punët e tjera të kryera nga agjencitë e emergjencës do të preken. Për shembull, Programi Kombëtar i Sigurimit nga Përmbytjet do të mbyllet, duke vonuar shpërndarjen e disa kredive hipoteke për pronat që kërkojnë polica nga programi i drejtuar nga qeveria.
Programet e ndihmës ushqimore do të preken gjithashtu. I pari që do të mbetet pa fonde do të jetë programi i ndihmës ushqimore për gratë dhe fëmijët, i cili mund të duhet të pezullojë ndihmën.
Mbyllja e qeverisë së Shteteve të Bashkuara ka “prekur” edhe ambasadën amerikane në Tiranë. Ambasada ka njoftuar përmes një postimi në rrjete sociale, se për shkak të vonesës në miratimin e fondeve buxhetore, llogaria në Facebook nuk do të përditësohet rregullisht me përjashtim të rasteve urgjente.
Ambasada njofton gjithashtu se gjatë kësaj kohe, edhe shërbimet për pasaportat dhe vizat që janë planifikuar do të vazhdojnë sipas mundësive.
“Për shkak të vonesës në miratimin e fondeve buxhetore, kjo llogari në Facebook nuk do të përditësohet rregullisht - me përjashtim të informacioneve urgjente për çështjet e sigurisë - derisa të rinisë veprimtaria e rregullt. Gjatë kësaj kohe, shërbimet e planifikuara të pasaportave dhe vizave për tranzit në Shtetet e Bashkuara dhe në ambasadat e konsullatat jashtë vendit do të vazhdojnë sipas mundësive. Për më shumë informacion mbi shërbimet tona dhe statusin operativ, vizitoni: travel.state.gov.” thuhet në reagimin e ambasadës.
Në Senatin prej 100 anëtarësh kërkoheshin 60 vota për të kaluar projektligji për shpenzime. Republikanët kishin propozuar që të zgjasnin financimin aktual deri në fund të nëntorit, me qëllim që të zhvilloheshin negociata për një plan për shpenzime afatgjatë.
Por, demokratët kërkuan që të riktheheshin qindra miliarda dollarë në shpenzimet për kujdesin shëndetësor, veçmas për programin për sigurime shëndetësore Obamacare për familjet me të ardhura të ulëta, që me gjasë administrata e Trumpit do ta largojë nga financimi.
Kjo është hera e parë që qeveria amerikane mbyllet pas mbylljes më të gjatë në histori, që zgjati 35 ditë, para pothuajse 7 vitesh, dhe do të ndalojë punën në disa departamente dhe agjenci federale duke prekur qindra mijëra punonjës qeveritarë.
Postimi i ambasadës së SHBA në Tiranë
Komente
