Drejtoria e Qendrës Spitalore Universitare “Nënë Tereza” ka reaguar pas lajmit për bojkotin e mjekëve të rinj specializantë, të cilët kanë vendosur disa kushte në letrën që i drejtuan ministrisë së Shëndetësisë. QSUT thekson se pas letrës u zhvillua një takim për të adresuar për zgjidhje disa kërkesa të tyre. Sipas QSUT-së disa pika u sqaruan, ndërsa u ra dakord që në ditët në në vijim të bisedohet për zgjidhjen e pikave të tjera.
"Lidhur me lajmin e shpërndarë në media “mjekët specializantë në QSUT do të bojkotojnë shërbimin e rojeve”, drejtoria e Qendrës Spitalore Universitare “Nënë Tereza” sqaron se, pas kërkesës së depozituar nga një grup specializantësh, ditën e sotme datë 27.06.2019, drejtuesit e QSUT zhvilluan një takim me një grup specializantësh të shërbimit të Kirurgjisë, për të adresuar për zgjidhje disa kërkesa të tyre për mbarëvajten e punës në shërbimin që kryejnë në QSUT.
Gjatë takimit u sqaruan disa pika nga kërkesat e grupit të specializantëve si dhe u ra dakort që në ditët në vijim të bisedohet për zgjidhjen e pikave të tjera. Ky komunikim mes drejtuesve të QSUT dhe një grupi mjekësh specializantë të shërbimit të Kirurgjisë nuk ndikon aspak procesin e punës në këtë shërbim si dhe nuk cënon shërbimin ndaj pacientëve që është në fokusin e punës tonë të përditshme" thuhet në njoftim.
Komente
