Jeta dhe veprimtaria e At Ambroz Marlaskaj, një intelektual i jashtëzakonshëm i fillimshekullit të XX-të vjen për herë të parë në një libër të plotë, ku publikohen dokumente të arkivës shtetërore.
Materialet e dorëshkrimet janë nxjerrë në dritë nga stërnipi i tij Ndoc Frroku, i cili e ka shkruar librin, nën kujdesin e redaktimin e shkrimtarit Ndue Dedaj dhe botuesit Frano Kulli.
Promovimi u bë në bibliotekën “Gjergj Fishta” me pjesmarrjen e intelektualëve nga Lezha e Mirdita.
“Për të shkruar këtë libër kam punuar mbi dokumentet e fondit të Arkivit të Shtetit”, tha autori Ndoc Frroku.
“Jam befasuar me pafundësinë e dokumenteve që autori ka mbledhur për të shkruar këtë libër”, u shpreh Dedaj.
“Libri nuk është empati për njeriun e fisit, por është studim i mirëfilltë për Marlaskajn”, vleresoi Kulli.
At Ambroz Marlaskaj, lindi në Mirditë në 1884 dhe u shua, në Romë në 1939. Pjesëmarrës në Komisinë Letrare të Shkodrës më 1916, së bashku me Gjergj Fishtën, prifti franceskan Marlaskaj ishte autor i shumë shkrimeve në revistën “Hylli i Dritës”. Botoi disa vepra, por la dhe disa të tjera në dorëshkrim, si: “Predke për ushtrime shpirtit”, “Historia e Kishës”, “Gramatikë Shqipe”.
At Ambroz Marlaskaj punoi për ta çuar shoqërinë përpara përmes të mësuarit. Ishte hartues tekstesh shkollore dhe fjalorësh në shqip e në latinisht, filozof, mendimtar e politikan, deputet i parlamentit shqiptar në 1923, i cilësuar si “gozhda e Parlamentit” për shkak të opozitarizmit të thekur. Me ardhjen e Ahmet Zogut në pushtet, emigroi në Itali derisa në amnistinë e vitit 1926 u kthye në atdhe.
Kronika e jetës së tij pasurohet veçanërisht me kohëqëndrimin si profesor dhe drejtues i katedrës dogmatike në Universitetin e Romës, ku shërbeu deri në fund të jetës së tij.
Komente
Ku mund ta gjejme kete liber ?
Përgjigju