Stuhitë e shiut dhe breshërit kanë shkaktuar dëme të mëdha në kulturat bujqësore në fshatrat e Qarkut të Elbasanit. Breshëri i pazakontë ka goditur dje fshatin Letan të Elbasanit, duke dëmtuar brenda pak minutash kulturat bujqësore, vreshta dhe dru frutorë. Fermerët shprehen se pasojat e këtij fenomeni natyror i kanë çuar drejt falimentimit.
Aty është bërë nami i zi, të gjitha lekët që patëm investuam dhe puna e një viti u bë tym për gjys ore, kërkojmë të paktën të shpërblehemi 50% se ne e dimë që është pune e zotit, por ne na është dëmtuar rrushi, ulliri, duhani, arra dhe të gjitha kulturat e tjera. Jemi dëmtuar nga breshëri në çdo vend, çdo familje këtu është dëmtuar në 3-4 milion lekë.
Fermerët
Ndërkohë dëme të shumta në sektorin bujqësor ka pasur edhe në fshatin Adriatik të Kurbinit, pasi një insekt i quajtur rrumbulli i majit, ka prekur edhe këtë vit pemët frutore dhe një pjesë të bimëve bujqësore.
Llojet e këtij insekti janë të shumta, por sipas banorëve, kësaj here insekti duket tepër agresiv. Në prefektura është ngritur një grup pune për verifikimin e dëmeve, por akoma nuk është vendosur nëse këta fermerë do të kompensohen.