Ambasadorët e vendeve anëtare të Bashkimit Evropian aprovuan unanimisht marrëveshjen post-Brexit për tregtinë duke i hapur kështu rrugë futjes në fuqi të saj.
Tanimë marrëveshja do të kalojë për t’u miratuar nga qeveritë e 27 vendeve anëtare të BE-së deri të martën.
Marrëveshja pritet të bëhet ligj më 1 janar të vitit 2021 teksa parlamenti britanik parashikohet ta ratifikojë atë me datë 30 dhjetor 2020.
Sipas rregullave të BE-së marrëveshja mund të hyjë në fuqi përkohësisht edhe pse Parlamenti Evropian parashikohet ta ratifikojë atë në muajin janar.
Në marrëveshjen e 24 dhjetorit parashikohet:
- vijim të tregtisë pa tarifa;
- zgjidhjen e detyrueshme të mosmarrëveshjeve në lidhje me çdo lloj konkurrence të pandershme;
- qasje të reduktuar të Britanisë në programet e BE-së në fushat e sigurisë dhe edukimit;
- periudhë tranzitore pesëvjeçare për kalimin e 25% të të drejtave për të peshkuar të BE-së flotës britanike;
Një nga aspektet më të diskutuara tanimë ngelet largimi i Britanisë nga programi shkëmbimit të studentëve ERASMUS.
Britania e Madhe votoi me një referendum për të dalë nga Bashkimi Evropian dhe e paraqiti kërkesën në vitin 2016, megjithatë u deshën katër vite negociata dhe një vit fazë tranzitore për të arritur në sigurimin e një marrëveshje mes palëve.
Kështu pas rreth 50 vitesh marrëdhënie tregtare me bllokun evropian, Britania e Madhe pritet të shkëputet dhe të nisë një periudhë të re, ku ka arritur të nënshkruajë një sërë marrëveshjesh tregtare, e fundit ishte ajo me Turqinë.
Komente
