BRITANIA E MADHE- Zyrtari i lartë mjekësor profesori Chris Whitty ka paralajmëruar se Britania e Madhe do të përballet me javët më kritike për sa i përket pandemisë.
“Javët e ardhshme do të jenë më të vështirat për sa i përket numrit të nfektimeve nga koronavirusi”, tha Whitty.
Ai nuk ka lënë pa i bërë apel qytetarëve të kujdesen dhe të vazhdojnë të zbatojnë masat anti-COVID në mënyrë që të minimizojmë sa më shumë të jetë e mundur numrin e infektimeve në vend.
Sipas zyrtarit të lartë mjekësor është jetësore dhe e domosdoshme të vazhdojmë vaksinimin e qytetarëve.
Ai ka folur dhe në lidhje me variantin e ri të koronavirusit, ku specifikisht ka thënë se varianti i ri mund të jetë një nxitje numri e infektimeve në një mënyrë që i “vjetri” nuk ishte në gjendje të bënte.
Numri total i infektimeve nga koronavirusi ka shkuar 3,072,349, ndërkohë që numri i viktimave është 81,431 që nga fillimi i pandemisë.
Së fundit në Britaninë e Madhe janë regjistruar rekorde negative për sa i përket numrit ditor të infektimeve, ku kanë qenë mbi 60 mijë raste.
Britania e Madhe u bë vendi i parë në botë i cili ka nisur vaksinimin masiv anti-COVID të qytetarëve dhe i pari i cili ka miratuar përdorimin e tre vaksinave të ndryshme, Pfizer, AstraZeneca dhe Moderna dhe megjithatë situata epidemiologjike paraqitet alarmante.
