Ministria e Mbrojtjes ka bërë të ditur përmes një njoftimi zyrtar në faqen e saj nisjen e një stërvitjeje të përbashkët ushtarake midis trupave britanike dhe Forcave të Armatosura Shqiptare në Pashaliman.
Stërvitja synon bashkëveprimin e trupave të NATO-së gjatë vështirësive që mund të ndeshin në aksione ushtarake që lidhen me lundrimin.
Sipas Ministrisë së Mbrojtjes stërvitja nis në 7 Tetor dhe do të kryhet në bashkëpunim me “Austere Wolf-24” në kuadër të “Corridor VIII Response”.
"Forcat tona të Armatosura do të zhvillojnë për gati dy javë Stërvitjen e Përbashkët detare bregdetare “Austere Wolf-24” me kolegët e tyre të Britanisë së Madhe, në Pashaliman në kuadër të “Corridor VIII Response”.
Kjo stërvitje parashikohet të zgjasë deri më 7 tetor 2024. Në të njëjtën periudhë, pala britanike, përpos zhvillimit të stërvitjes “Austere Wolf 24” parashikon të zbarkojë në vendin tonë edhe trupat e NATO “Strategic Reserve Force” (SRF), të cilat do të vijojnë kalimin në itinerarin e Korridorit VIII, Shqipëri (Durrës ose Vlorë) - Maqedoni e Veriut - Kosovë - Shqipëri.
Stërvitja “Austere Wolf-24”, e planëzuar nga pala britanike, ka për qëllim zbarkimin e trupave dhe mjeteve lundruese në kushte të vështira bregdetare në bashkëpunim me vendin pritës. Qëllimi i kësaj stërvitje është promovimi i ndërveprueshmërisë midis vendeve anëtare të NATO-s. Në këtë stërvitje Forcat tona të Armatosura do të angazhojnë anije patrulluese dhe zhytësit e Forcës Detare, trupa të Forcës Tokësore e deri te suporti me helikopter nga Forca Ajrore."-njoftoj Ministria e Mbrojtjes.
