TIRANE- Edhe pse në rënie në muajit e fundit inflacioni është sfida kryesore e ekonomisë edhe për vitin që vjen. I pranishëm në Komisionin e Ekonomisë Guvernatori i Bankës së Shqipërisë Gent Sejko, tha se prioritet i politikave fiskale duhet të jenë çmimet, pasi ato po gërryejnë fuqinë blerëse të familjeve.
“Nivelet e larta të inflacionit kanë qenë dhe mbeten sfida prioritare e politikave tona ekonomike. Ne vazhdojmë të sugjerojmë hartimin e planeve të kontigjencës, për të përballuar ndikimin e mundshëm negativ, që goditje të paparashikuara mund të kenë në realizimin e të ardhurave. Këto plane kontigjence duhet të synojnë – në çdo rast – respektimin e kufijve të miratuar të deficitit buxhetor dhe ruajtjen e trajektores rënëse të borxhit publik.”, tha Sejko.
Teksa e vlerëson realist projektbuxhetin e vitit 2024 për nevojat që ka vendi, Sejko ngriti në komision shqetësimin për deficitin e lartë që po shkakton skema e pensioneve, ku kontributet nuk mbulojnë dot shpenzimet për pensione.
“Banka e Shqipërisë sugjeron rishikimin periodik të kuadrit ligjor që rregullon skemën e pensioneve, atë të sigurimeve shëndetësore dhe skemat e tjera të sigurimeve sociale. Po ashtu, ne inkurajojmë intensifikimin e përpjekjeve për zhvillimin e shtyllës së dytë e të tretë të sistemit privat të pensioneve, atë të sigurimit të detyrueshëm dhe vullnetar”, tha Sejko.
Banka e Shqipërisë sugjeron ndërtimin e një plani për të rritur nivelin e të ardhurave, si dhe kërkon efikasitet në shpenzi9me dhe shpërndarje më të mirë të investimeve publike. Një tjetër rekomandim i dhënë ishte për koncesionet për një monitorim më të mirë për të ulur çdo rrezik që mund të vij prej tyre.
