Sendet që ndalohen dhe futen në burgje është një problematikë e rëndësishme në Institucionet e Ekzekutimit të Vendimeve Penale, por më shqetësues është fakti se hetimet nuk çohen asnjëherë në fund për këtë vepër penale.
Për këtë arsye, përmes një shkrese të posaçme, drejtori i Përgjithshëm i Burgjeve Agim Ismaili i është ankuar Prokurorisë se Përgjithshme për hetime të pamjaftueshme nga ana e prokurorëve. Ismaili ka shkruar në letër se niveli i hetimeve thuajse gjithnjë kufizohet bazuar në raportet e shërbimit të policisë dhe nuk thellohet, nuk kryhen ekspertimet e celularëve, nuk hetohen as bashkëpunëtorët etj.
Ne lidhje me këto shqetësime, Prokurori i Përgjithshëm Olsjan Çela i ka bërë thirrje prokurorive të rretheve që të vlerësojnë rast pas rasti gjendjen, ecurinë e hetimeve dhe marrjen e masave sipas ligjit.
Në letrën e siguruar nga Report Tv Çela kërkon që të adresohen të gjitha shqetësimet e Drejtorisë së Burgjeve.
Shkresa e Prokurorit të Përgjithshëm, Olsjan Çela
