Ministri në detyrë për Evropën dhe Punët e Jashtme, Gent Cakaj, zhvilloi një takim me MEPJ, me Ministrin e Jashtëm të Polonisë, Jacek Czaputoëicz, Ministrin e Jashtëm të Letonisë, Edgars Rinkēvičs, Ministrin e Jashtëm të Lituanisë, Linas Antanas Linkevičius dhe Nënsekretarin e Shtetit për Çështjet Evropiane në Ministrinë e Jashtme të Estonisë, Märt Volmer.
Sipas zyrës së shtypit, takimi u fokusua në çështje që lidhen me procesin integrimit evropian të Shqipërisë, në të cilin mbështetja që japin këto vende, për fillimin e menjëhershëm të bisedimeve për anëtarësim me Bashkimin Evropian, është absolute.
Në konferencën për shtyp, të zhvilluar, Cakaj u shpreh se forma e re e negociimit, i siguron vendet anëtare në përgjithësi dhe vendet skeptike në veçanti, se përparimi në rrugën e anëtarësimit në Bashkimin Evropian do të kushtëzohet drejtpërdrejtë nga përparimi i prekshëm, reformat e thella dhe zhvillimi i qëndrueshëm.
“Shqipëria, natyrisht, mirëpret metodologjinë e re duke vlerësuar nevojën e rritjes së besueshmërisë së BE-së në Ballkanin Perëndimor”, është shprehur ai.
Sa i përket raportit të progresit, i cili u publikua menjëherë pas metodologjisë së re, Cakaj tha se Komisioni Evropian edhe një herë ka rekomanduar çeljen e menjëhershme të bisedimeve për anëtarësim në Bashkimin Evropian, bazuar në meritat madhore të Shqipërisë.
Për më tepër, Cakaj shprehu angazhimin e plotë të Qeverisë shqiptare për të përkthyer vlerësimin teknik të Komisionit në vullnet politik të Këshillit, nëpërmjet një pune të strukturuar e intensive.
Cakaj i shprehu mirënjohjen Polonisë, Letonisë, Lituanisë dhe Estonisë, edhe për mbështetjen e pakursyer teknike e institucionale, për të rritur kapacitetet institucionale e profesionale të Shqipërisë në procesin e integrimit.
