KUKES-Policia e Njësisë së Autostradave ka vendosur 140 gjoba vetëm gjatë 24 orëve të fundit, si rezultat i kontrolleve të intensifikuara me tre radarë, njëri prej të cilëve i vendosur në tunelin e Kalimashit, në Rrugën e Kombit.
Nga pamjet e regjistruara nga radarët, disa automjete kanë qarkulluar me 122 km/h por edhe shpejtësi ekstreme, duke arritur deri në 250 km/h në Tunelin e Kalimashit.
"Shkelësit më të shumtë të Kodit Rrugor janë drejtuesit me targa të Kosovës, të cilët përbëjnë rreth 60% të rasteve të evidentuara", tha efektivi për Report TV.
Ndër të gjobiturit është 28-vjeçari me origjinë nga Kosova dhe banim në Turqi, i cili për herë të parë po udhëtonte nga Kosova në Shqipërii e mandej drejt Malit të Zi. Ai u kap duke udhëtuar me 110 km/h në segmentin Morinë-Kukës, ku shpejtësia e lejuar është 90 km/h.
“Ishim me nxitim, dhe e pranojmë që po drejtonim makinën me shpejtësi. Nuk pamë tabelën paralajmëruese për kufizimin, dhe menjëherë na ndaloi policia” u shpreh Rexhep Mertkan për Report TV.
Masat ndëshkuese janë vendosur kryesisht për shpejtësi mbi normat e lejuara, por edhe për parakalime të gabuara, mosvendosje të rripit të sigurimit dhe pozicionim të gabuar në korsi. Gjobat për këto shkelje variojnë nga 20 mijë deri në 40 mijë lekë.
Komente
