COVID-19 po përhapet në shkolla dhe universitete. Mësues dhe nxënës rezultojnë të prekur në Bulqizë, Berat dhe Kuçovë, por mësimi është pezulluar vetëm në klasa të caktuara.
Sakaq pozitivë me COVID-19 kanë rezultuar dhe tre pedagogë të universitetit të Vlorës.
Koronavirusi ka prekur dhe Gjykatën e Elbasanit.
Këtë të hënë (21 shtator) janë regjistruar dy raste të reja, një punonjëse dhe një oficer i policisë gjyqësore.
Ata aktualisht janë vetëkarantinuar në banesat e tyre.
Një nxënëse e klasës së 11-të në gjimnazin "Siri Shapllo" në Gjirokastër, ka rezultuar pozitive me koronavirus.
Për rrjedhojë, 23 nxënësit e tjerë të klasës kanë bërë tamponin sot në mëngjes. Akoma nuk dihet se ku e ka marrë virusin nxënësja e kësaj shkolle. Njoftohet se kjo klasë nuk do të zhvillojë mësim për 14 ditë.
BERAT- Një nxënës i klasës së 11 të gjimnazit "Ajet Xhindole" ka rezultuar pozitiv me COVID-19, për pasojë është pezulluar mësimi në shkollë vetëm për këtë klasë.
Të gjithë nxënësit e kësaj klase si dhe 4 mësues janë karantinuar. Ata kanë bërë tamponin dhe presin përgjigje. Aktualisht mësimi për ta zhvillohet online. Pjesa tjetër e shkollës vijon mësimi normalisht. Ndërsa në shkollën e fshatit Mbrakull kanë rezultuar 4 mësues pozitiv.
Mes rasteve të konfirmuara është edhe një polic.
VLORË- Koronavirusi mbyll tri zyra në godinën e Rektoratit të universitetit Ismail Qemali të Vlorës. Siç mësohet është mbyllur zyra e sektorit të auditit, zyra e seksionit të promovimit akademik dhe kërkimit shkencor si dhe zyra e komunikimit dhe marrëdhënieve me publikun.
Lajmi konfirmohet edhe nga vetë rektorati, për mbylljen e zyrave pas infektimit me koronavirus të tre personave në këtë universitet. Ndërkohë që 10 persona të tjerë janë karantinuar deri në mbërritjen e përgjigjes së tamponit. Priten përgjigjet për personat e tjerë që kanë qenë në kontakt me të infektuarit.
Mësohet se është kryer dezinfektimi në të tri godinat universitare, ndërsa aktualisht në të gjitha degët e 4 fakulteteve të Ismail Qemalit po kryhen konsultimet dhe leksionet për çështjet e trajtuara në mësimin akademik online. Në fillim të tetorit pritet të zhvillohen provimet e sezonit të vjeshtës, ndërsa regjistrimet e maturantëve për programet e studimit në këtë universitet publik janë në fazën e dytë të tyre. Mësimi po bëhet online dhe ambientet po dezinfektohen.
Tre punonjëse të një fasonerie në Pogradec kanë rezultuar pozitive me koronavirus. Gjithashtu janë infektuar edhe dy infermiere të cilat punojnë në qendrat shëndetësore në fshatrat e Pogradecit, si dhe një nxënës në një nga shkollat e qytetit.
Mësohet se fasoneria me 110 punonjës është mbyllur dhe dezinfektuar, ndërkohë që janë dezinfektuar edhe ambientet e qendrave shëndetësore.
Nxënësi i infektuar është kontakt i një prej punonjësve të fasonerive dhe ai nuk është paraqitur asnjë ditë në shkollë. Infermieret dhe punonjëset e fasonerisë janë gra të moshave 30-50 vjeç.
Institucionet publike në Kuçovë janë prekur nga pandemia e koronavirusit. Disa ditë më parë u konfirmuan 6 raste pozitive me Covid19, të cilët rezultuan se ishin pensionistë.
Sipas informacioneve, një edukatore në një kopsht në Kuçovë dhe fëmija e saj 5 vjeçe, që është e regjistruar në të njëjtin kopsht, janë prekur nga virusi Covid19.
Edukatorja ka qenë aktive në punë, deri në momentin që ka shfaqur shenjat e virusit dhe pas kryerjes së tamponit ka rezultuar me koronavirus.
Edukatorja është karantinuar së bashku me familjen e saj, ndërkohë që janë karantinuar edhe 12 fëmijët e grupit ku ajo punonte, të cilët do ti nënshtrohen testimit.
Gjithashtu edhe një punonjëse fasonerie në qytetin e Kuçovës ka rezultuar e prekur me koronavirus. Ajo është shkëputur nga puna vetëm në ditën që ka bërë tamponin, duke alarmuar kolegët e saj dhe punonjëset e repartit ku ajo punonte.
Burimet zyrtare të Drejtorisë së Higjenës bëjnë me dije se është kryer dezinfektimi i kopshtit dhe fasonerisë në Kuçovë, si dhe janë mbyllur dy reparte të fasonerisë dhe grupi i fëmijëve ku punonte edukatorja e infektuar.
LUSHNJE- Koronavirusi është "futur" edhe në njësinë administrative Bubullimë në qytetin e Lushnjes.
Report Tv mëson se dy punonjës kanë rezultuar pozitiv me COVID-19, e për pasojë janë mbyllur zyrtar e këtij institucioni.
Pjesa tjetër e punonjësve iu është nënshtruar tamponit, teksa nuk ka ende një informacion zyrtar se për sa kohë do të qëndrojnë zyrat të mbyllura.
