Rene Dinesen, Ambasadori i Danimarkës në Vjenë ka njoftuar sot se vendi tij i ka dhuruar Shqipërisë 30 ventilatorë që do të përdoren për pacientët e prekur nga infeksioni i koronavirusit
“30 ventilatorë që janë shumë të nevojshëm për pacientët me COVID-19 kanë mbërritur në Shqipëri që nga Danimarka. Qeveria daneze ka kënaqësinë të ndihmojë kështu miqtë dhe aleatët tanë”, tha Dinesen.
Në muajin prill, kur pandemia po regjistronte shifra alarmante në shumë vende të botës, qeveria shqiptare i bëri një kërkesë zyrtare NATO-s për 300 ventilatorë, 500 shtretër dhe pajisje të tjera të nevojshme.
Shqipëria është duke parë një numër të lartë me raste të reja ditore, më shumë 100 të infektuar çdo ditë.
Autoritetet shëndetësore janë shprehur se situata mbetet në kontroll, pasi numri i pacientëve që kanë nevojë për kujdes intensiv ka qenë i përballueshëm nga kapacitetet spitalore.
