Kryetarja e re e Këshillit të Qarkut Gjirokastër do të jetë Lindita Rova, por zgjedhja e saj ka shkaktuar debat brenda socialistëve. Ajo është zgjedhur në këtë post me shumicë votash duke qenë edhe kandidatja e vetme e propozuar në mbledhjen e parë të Këshillit të Qarkut. Anëtarët ranë dakord që votimi të ishte i hapur. I pranishëm në mbledhjen e Këshillit ishte edhe ministri Bledi Çuçi, i deleguari politik i socialistëve në qarkun Gjirokastër, si dhe deputetja Artemis Malo.
Por gazetari i Report Tv në Gjirokastër, Piro Nase raporton se pak ditë më parë kur u përzgjodh emri i Rovës ka pasur debate në mbledhjen e zhvilluar mes socialistëve në Vlorë të kryesuar nga Gramoz Ruçi, që është koordinatori i PS-së për Jugun.
Në momentin që drejtuesi politik i PS-së për Gjirokastrën Bledi Çuçi propozoi emrin e Lindita Rovës ka pasur kundërshti nga kryebashkiaku i Tepelenës, Tërmet Peçi, i cili kërkoi që në këtë post të zgjidhej Matilda Sala. Por emri i Salës, e cila ka qenë edhe kandidate për deputete në listën e PS-së për qarkun e Gjirokastrës në vitin 2017 nuk është pranuar duke u rrëzuar. Fakti që nuk u zgjodh nga socialistët për të drejtuar qarkun ka sjellë pakënaqësi te Matilda Sala duke bërë që të japë dorëheqjen si këshilltare.
Lindita Rova është e para grua që drejton Këshillin e Qarkut Gjirokastër. Prej vitit 2013 ajo ka mbajtur postin e drejtoreshës së Arsimit nē Gjirokastēr. Nënkryetar i Këshillit u zgjodh Hodjan Selmani nga Këlcyra. Me zgjedhjen e kryetarit të Këshillit të Qarkut përmbyllet në këtë mënyrë procesi i 30 qershorit në Gjirokastër.
Komente
