Gjykata e Posaçme kaloi për gjykim dosjen në ngarkim të ish-deputetit socialist Jurgis Çyrbja me akuzat për nxjerrjen e sekretit shtetëror, përkrahje të autorit të krimit dhe korrupsion në zgjedhje.
Pjesë e dosjes është edhe Altin Hajri dhe Ahmet Masha, avokatët e të cilëve kërkuan gjykim të shkurtuar ashtu si edhe Çyrbja.
Ish-deputeti akuzohet për dekonspirimin e aksioneve policore, nxjerrjen e të dhënave nga TIMS dhe informacione të tjera për të ndihmuar personat në kërkim që të mos kapeshin.
Në dosjen e SPAK thuhet se ish-deputeti Çyrbja ka pasur miqësi me Altin Hajrin, duke i premtuar këtij të fundit se do ta ndihmonte në këmbim të votave gjatë zgjedhjeve.
Çyrbja dhe Masha mbahen të arrestuar, ndërkohë që Hajri në kërkim edhe për rrëmbimin dhe zhdukjen e Jan Prengës, nga arratia ka autorizuar me prokurë avokatin e tij që ta përfaqësojë në këtë proces.
Çyrbja u arrestua më 20 tetor 2024 me urdhër të SPAK. Ai ka qenë deputet i Kuvendit për dy legjislatura, dhe ka dhënë dorëheqjen nga mandati në tetor 2024, në kohën kur hetimet e SPAK kishin hyrë në fazën përfundimtare.
Komente
