Për të tretën herë radhazi banorët e pallatit nr.7 në rrugën “3 vëllezërit Thanasi”, në zonën e plazhit, kanë protestuar para bashkisë së Durrësit, duke kërkuar rikonstruksionin e pallatit të tyre me dëmtime DS3.
Kërkesa e bërë prej tyre në Gjykatën e Shkallës së Parë Durrës për pezullimin e punimeve të firmës së ndërtimit që po ndërton një pallat të ri ngjitur me pallatin e tyre është hedhur poshtë nga gjyqësori. Të pashpresë ata kërkojnë tashmë vetëm riparimin e apartamenteve të tyre, që u dëmtuan nga tërmeti i 26 nëntorit 2019.
“Sot kemi ardhur një pjesë e banorëve sepse një pjesë mesa duket u kanë bërë presion institucionet ose firma nuk e di dhe janë tërhequr me justifikime të ndryshme. Kemi ardhur të protestojmë se gjykata dhe prokuroria na ka lënë në heshtje. Kishim dje vendimin që do të pezullonte punimet e firmës, momentalisht do të bëhet dhe një rishqyrtimi i lejes. Zonja ka marr lekët mesa duket, nuk pinë ujë fare ato letra që ne kemi marrë nga të gjithë institucionet dhe tha që rrëzohet kërkesa juaj”, tha një banor
“Nga bashkia kërkojmë që të vijnë dhe të shohin gjendjen e pallatit, të ndalojnë punimet e objektit që po ndërtohet aty”, shprehet një tjetër.
Prej disa javësh banorët e këtij pallati kanë organizuar protesta të vazhdueshme para prokurorisë së Durrësit dhe sheshit ku po ndërtohet objekti i ri.
