Një shoqëri me pronar biznesmenin Gentjan Sula ka marrë pa garë dhe pa transparencë pronat publike në bregdet. Denoncimi është bërë sot nga Partia Demokratike një ditë pas ngjarjes së rëndë në Velipojë, ku për pak metra territor në plazh i vranë 4 persona.
Sipas zëdhënëses së PD, Ina Zhupa, 55 mijë m2 tokë në bregdet, në zonën e Hamallajt u janë dhënë miqve të Ramës me çmim më të ulët se çmimi i tregut për biznese korruptive.
'Më datë 19 Maj 2021, njëlloj siç ka bërë gjatë keqqeverisjes së tij, Edi Rama ka vendosur të trajtojë si plaçkë personale një tjetër pasuri publike të shqiptarëve. Plot 55 mijë m2 tokë në bregdet, në zonën e Hamallajt, pa garë dhe pa asnjë transparencë, ka vendosur t’ia jap dy miqve të tij në një biznes korruptiv, shoqërisë “Sviluppo Mare 1” sh.p.k., me pronar Redi Pezën dhe “S&D Invest” sh.a., me pronar Gentjan Sulën.
Çmimi i vendosur për shitje është disa herë më i ulët se çmimi i tregut në atë zonë bregdetare, rreth 1,100 lekë për metër katror. Siç provon ky dokument shtetërore, vendimi i Këshillit të Ministrave nr. 292, datë 19.5.2021, 55 mijë metra tokë shtetërore në bregdet i është dhënë dy oligarkëve të Edi Ramës, Redi Peza dhe Gentjan Sula, për 59,565,000 lekë.'- thotë ndër të tjera Zhupa.
