Kryetari i PD-së, Sali Berisha, ishte në qarkun e Shkodrës sot, në turin e takimeve elektorale, duke mbajtur fjalim para mbështetësve në Malësinë e Madhe, ku prezantoi edhe kandidatët për deputetë në zgjedhjet e 11 majit.
Teksa iu rikthye edhe një herë premtimeve elektorale për rroga, pensione, çmime, legalizime, ujë dhe drita, që sa ishte kryeministër nuk i realizoi dot, nuk kurseu akuzat edhe ndaj kundërshtarit të tij më të ri, Lulzim Basha, nga i cili duket se po frikësohet për rrjedhjen e votave pas përçarjes.
Berisha u përpoq të krijonte diversion, duke u bërë thirrje mbështetësve të Bashës që të riktheheshin tek PD-ja, duke e etiketuar me epitetin “Lul Brava” që shkatërroi opozitën për qëllimet e Ramës.
Basha nga ana tjetër ka akuzuar Berishën se ka marrëveshje me Ramën, teksa ky i fundit i dha edhe vulën dhe logon e partisë kreut të PD-së.
“Tani fshihet pas gishtit. Unë e nisa këtë mision sepse e pashë se Shqipëria ishte pa opozitë. Shqipëria pa opozitë ishte natë e zezë. Ku shkojnë këta? E donin pa opozitë vendin. I ftoj edhe këta këtu, Kokajt, që janë këtu, që janë të ‘Lulzim Bravës’ më duket (qesh). Nëse ju ka mbetur në gjakun tuaj një miligram demokrati, mendoni një minutë se ku do ishte opozita sot, po të ndiqnit idilin Rama-Brava?! E shihni se ku përfundoi, se çfarë ndodhi me Lulzim Bravën. Me gili-gili e vili-mili çdo ditë (për Ramën). A ka keqpërdorim më të madh se ky? A e patë se ça ndodhi? A mund të pranoja unë një gjë të tillë? Kurrë, s'mund ta pranoja kurrë! Ishin rrethanat që më detyruan mua që të kthehem dhe jam më i vendosur se kurrë”, u shpreh kreu i selisë blu.
Berisha iu kthye edhe sigurisë ushqimore, duke marrë shkak nga ngjarjet e fundit, duke u shprehur se edhe kryeministri Rama është prekur nga Salmonela.
“Këtu siguria ushqimore është pasiguria më e madhe. Nga mandarinat e helmuara, me pesticide, te të tjerat. Një herë tjetër shpërndahet salmonela, e cila arrin gjer në Surrel. Ekzakt ua them unë këtu, s’ua kam thënë tjetërkund. Sëmuret edhe ai vetë e del e gënjen mjekun, i thotë “u sëmura se kam breshka në shtëpi”. U sëmur nga salmonela që erdhi me pula. Erdhi nga deputetët e tij salmonela! Mishi i infektuar, nuk ka asnjë siguri. Kur shkoi në spital, u tha ma dhanë breshkat salmonelën, ça breshkash?! Fileto pule (qesh). I gënjente mjekët, i gënjente. Del e na thotë pasaportë europiane. Pasaportë europiane me pesticide, e salmonelë. Siguria ushqimore do jetë çështje e sigurisë kombëtare”, akuzoi Berisha.
Ai gjithashtu vuri në dukje edhe rastin e investitorit italian Francesco Becchetti, për të cilin tha se do paguhen 110 mln euro nga buxheti i shtetit, duke premtuar rikthimin e tyre nëpërmjet auditit.
“...ose rasti Beketi. E dëboi se e sulmonte ia hoqi bizneset dhe tani duhet të paguajë 110 mln euro. Janë taksat e shqiptarëve ato. Do kthehen të gjitha, do i gjejmë, gërshërët e ligjit”.
Berisha sulmoi edhe kandidatët për deputetë të PS-së në Shkodër, duke i quajtur “deputetët e Dobraçit”, teksa e lidhi me bandën e bajrave.
“Deputetët e Shkodrës janë ata të Dobraçit, Enveri me shokë, të tjerët janë në burg, bankomati i Shkodrës. Zero tolerancë ndaj krimit të organizuar. S’mund të ketë një vend me burgosje politike, si Koreja e Veriut”.
Komente
